09.06.2026 | 23:19
Կանանց Հայաստանի հավաքականը 0:6 հաշվով պարտվեց Բելառուսին. ՏԵՍԱՆՅՈՒԹ
Ուկրաինան Արևմուտքին կոչ է անում Պուտինի մասնակցության դեպքում բոյկոտել Բաքվում կայանալիք COP-29-ը
Քաղաքականություն
17.10.2024 | 12:53
Միջազգային հանրությունը պետք է խուսափի Ադրբեջանում կայանալիք COP29 կլիմայական գագաթնաժողովին մասնակցությունից, եթե դրան ներկա լինի ՌԴ նախագահ Վլադիմիր Պուտինը։ Այս մասին POLITICO-ին ասել է ԵՄ-ում Ուկրաինայի դեսպան Վսևոլոդ Չենցովը։
«Մենք պետք է գործադրենք այդ ճնշումը, և մեր գործընկերները պետք է հասկացնեն Ադրբեջանին, որ եթե Պուտինն այնտեղ է, ապա իրենք չեն գնա»,- նշել է դեսպանը։
Այս կոչը հնչում է այն բանից հետո, երբ Կրեմլը երեքշաբթի հայտարարել էր, որ Պուտինը դիտարկում է ՄԱԿ-ի աջակցությամբ կազմակերպվող ամենամյա կլիմայական հավաքին մասնակցելու հնարավորությունը, որը կսկսվի նոյեմբերի 11-ին Ադրբեջանի մայրաքաղաք Բաքվում:
Չենցովը նշել է, որ Ադրբեջանը գնալով «ավելի կախված» է դառնում ԵՄ-ից՝ հաշվի առնելով, որ միությունը դիմում է նավթով և գազով հարուստ հարավկովկասյան երկրին՝ օգնելու փոխարինել ռուսական հանածո վառելիքը:
«Նրանք ցանկանում են զարգացնել համագործակցությունը ԵՄ-ի հետ և պետք է շատ զգույշ լինեն այս հարցում»,- ասել է ուկրաինացի դիվանագետը՝ պնդելով, որ դա Բրյուսելին առանցքային լծակներ է տալիս Բաքվի նկատմամբ:
Պուտինը վերջին տարիներին կրճատել է միջազգային ճամփորդությունները։ Միջազգային քրեական դատարանի (ICC) կալանքի հրամանը ռազմական հանցագործությունների մեղադրանքների համար սահմանափակում է նրա ընտրությունը: Ադրբեջանը, սակայն, ՄՔԴ-ի մաս չէ, այսինքն՝ պարտավոր չէ կալանավորել Ռուսաստանի ղեկավարին երկիր այցելելիս: Պուտինն օգոստոսին եղել է Ադրբեջանում՝ բանակցություններ վարելով Ադրբեջանի նախագահ Իլհամ Ալիևի հետ։
Չենցովն ընդգծել է, որ ՄՔԴ-ի կալանքի հրամանը պետք է բավարար լինի Պուտինի ներկայությունը մեծ դիվանագիտական միջոցառմանը խափանելու համար:
«Մենք զգուշացնում ենք մեր գործընկերներին, որ Ռուսաստանի գործողությունները ռազմական հանցագործություններ են, և մենք ընդգծում ենք՝ պետք է գիտակցենք, որ Ռուսաստանը փորձում է նորմալ դարձնել պատերազմը»,- ասել է ուկրաինացի դիվանագետը։
ԵՄ բարձրաստիճան պաշտոնյան POLITICO-ին ասել է, որ Կրեմլը չպետք է խաթարի կլիմայական կարևոր համաժողովը։
«Մենք չենք վախենում Պուտինից, եթե նա գա, դա հնարավորություն կլինի դիմակայելու նրա ստերին և ագրեսիային»,- անանունության պայմանով պարբերականին ասել է պաշտոնյան։
Թարգմանությունը՝ Էմմա Չոբանյանի
