Տոնական օրվա տխուր ավարտ․ ինչու են երևանցիները համերգից հետո մնացել կանգառներում. ՏԵՍԱՆՅՈՒԹ

Մինչ Երևանի քաղաքապետ Տիգրան Ավինյանը Էրեբունի-Երևանի 2806-ամյակի տոնակատարությունների մեկնարկից առաջ հայտարարում էր նոր՝ չինական ավտոբուսների առաջին խմբաքանակի ժամանման մասին, քաղաքապետարանի կազմակերպած տոնական համերգից հետո շատ քաղաքացիներ մնացին կանգառներում։ 

Երևանի ավագանու «Մայր Հայաստան» խմբակցության ղեկավար Մանուկ Սուքիասյանն արձանագրում է՝ համերգից հետո զանգվածային դժգոհություններ կային տրանսպորտի բացակայության հետ կապված։

«Այդ տոնի մի գեղեցիկ կոմպոնենտ կարող էր լինել, որ ժամը 22։00-ից հետո տրանսպորտն աշխատեր և՛ երկարացված ռեժիմով, և՛ լիներ անվճար»,- ասում է Սուքիասյանը։

«Ազգային առաջընթաց» խմբակցության ղեկավար Արամ Թորոսյանը ողջունում է քաղաքի տոնի առիթով նման մասշտաբային միջոցառումներ նախաձեռնելը, բայց և ընդգծում է՝ կազմակերպչական առումով թերություններ կային։

«Ուղղակի պետք է նախապես մտածեին, անվճար ավտոբուսներ բերեին․ եթե անում ես նման միջոցառում ու շատ լուրջ գումարներ ես ծախսում, պիտի ամեն դետալի մասին մտածես»,- ընդգծում է Թորոսյանը։

Ավագանու իշխող ՔՊ խմբակցության ղեկավար Արմեն Գալջյանն էլ հակադարձում է ընդդիմախոսներին՝ թեև տրանսպորտն աշխատել է սովորականի պես, բայց ավելի շատ ավտոբուսներ են գիծ դուրս բերվել։

«Մարդկային հոսքը շատ մեծ էր կենտրոնում, քան սովորական այլ օրերին։ Տրանսպորտն աշխատել է սովորականի պես, բայց ինտերվալները շատ են եղել, այսինքն՝ ավելի շատ ավտոբուս է գիծ դուրս բերվել դեպի կենտրոն, բայց ամեն դեպքում էլի չի զգացվել, քանի որ խցանումներ են եղել»,- մանրամասնում է Գալջյանը։

Բայց և այնպես, ՔՊ խմբակցության ղեկավարն ընդունում է՝ երթևեկության առումով երեկ խնդիրներ առաջացել են։ Արամ Թորոսյանն էլ ասում է՝ համերգի կազմակերպիչ քաղաքային իշխանությունը կարող էր հաշվի առնել նաև ավագանու կարծիքը։ 

Քաղաքային նախկին իշխանությունների օրոք եղել են դեպքեր, երբ տոն օրերին երկարաձգվել է հանրային տրանսպորտի և մետրոյի աշխատանքը․ ինչո՞ւ այս անգամ նման մոտեցում չեղավ՝ քաղաքապետարանից այս հարցին չեն պատասխանում։ 

Մանրամասները՝ տեսանյութում։

Արփի Հակոբյան