Քաղաքապետարանում երկու տասնյակ նոր հաստիքներ կստեղծվեն. հարցն ավագանու նիստի օրակարգում է

Երևան քաղաքի ավագանու հերթական նիստի օրակարգում ընդգրկված է քաղաքապետարանի աշխատակազմի հաստիքացուցակն ավելացնելու որոշման նախագիծ։

Ըստ չզեկուցվող նախագծի՝ առաջարկվում է աշխատակազմի կոմունալ տնտեսության վարչության կենսապահովման բաժինը համալրել 1 միավոր գլխավոր մասնագետի (աշխատավարձը՝ 289,000 ՀՀ դրամ) և 1 միավոր առաջատար մասնագետի (282,200 ՀՀ դրամ) հաստիքային միավորներով: Նախագծի հիմնավորման մեջ նշված է, որ մայրաքաղաքում վերջին շրջաններում տեղումների աննախադեպ քանակով, մայրաքաղաքի բնակարանային ֆոնդի ավելացմամբ, գրունտային հատվածների ասֆալտապատմամբ և մայրաքաղաքի հեղեղատար համակարգի տեխնիկական մաշվածությամբ պայմանավորված՝ ավելացել են աշխատանքային ծավալները։ Նշված է նաև, որ «ՀԷՑ» ՓԲԸ-ի կողմից նախաձեռնվել է «Փոքր կենտրոն»-ի էլեկտրամատարակարման արդիականացման աշխատանքների ծրագիր, որն առաջիկա տարիներին ընդլայնվելու է՝ ընդգրկելով բոլոր վարչական շրջանները:

Առաջարկվում է հաստիքացուցակի փոփոխություններ անել նաև լրատվության վարչությունում։

«Վարչության առջև դրված խնդիրների առավել արդյունավետ լուծման նպատակով և աշխատանքի պլանավորման առաջնահերթությամբ պայմանավորված՝ անհրաժեշտություն է առաջացել վարչության գործող հաստիքացուցակում լրագրողի մեկ հաստիքային միավորը փոխարինել լուսանկարչի լրացուցիչ հաստիքային միավորով (աշխատավարձը՝ 357,000 ՀՀ դրամ), իսկ հեռարձակման ռեժիսորի հատիքը փոխարինել գրաֆիկ դիզայների հաստիքով (աշխատավարձը՝ 272,000 ՀՀ դրամ)՝ պահպանելով գործող ամսական պաշտոնային դրույքաչափերը»,- նշված է որոշման նախագծի հիմնավորման մեջ։

Բացի այս, առաջարկվում է նաև բարձրացնել Երևանի քաղաքապետարանի պաշտոնական կայքի թարգմանչի աշխատավարձը՝ գործող 272,000 ՀՀ դրամը դարձնելով 357,000 ՀՀ դրամ:

Քաղաքային իշխանությունն առաջարկում է Քարտուղարության ու Զանգերի սպասարկման և աջակցման բաժինները համալրել ևս 2 միավոր գլխավոր մասնագետի հաստիքային միավորներով։ Աշխատավարձերը համապատասխանաբար՝ 323,000 ՀՀ դրամ և 289,000 ՀՀ դրամ։

Կավելանա նաև քարտուղարության արխիվային գործի վարման բաժինը 2 հաստիքով՝ 1 միավոր առաջատար մասնագետ (աշխատավարձը՝ 282,200 ՀՀ դրամ) և 1 միավոր առաջին կարգի մասնագետ (աշխատավարձը՝ 272,000 ՀՀ դրամ)։

Քարտուղարության կազմը կհամալրվի նաև 2 գործավարի հաստիքով՝ 248,200 ՀՀ դրամ աշխատավարձով։ Ընդհանուր առմամբ՝ Քարտուղարության հաստիքացուցակը կավելանա 6 միավորով։

Երևանի քաղաքապետարանի աշխատակազմի մատակարարման և տեխնիկական սպասարկման վարչության գլխավոր մասնագետի 3 հաստիքներից մեկը կփոխարինվի վարչության պետի տեղակալի հաստիքով` 561,000 ՀՀ դրամ աշխատավարձով, իսկ գլխավոր մասնագետի երկրորդ հաստիքը կփոխարինվի առաջին կարգի մասնագետների երկու միավոր հաստիքներով՝ 282,200 ՀՀ դրամ աշխատավարձով։

Երևանի Նորք-Մարաշ վարչական շրջանի ընդհանուր բաժնում կավելանա 1 ﬕավոր առաջատար մասնագետի հաստիքային ﬕավոր: Աշխատավարձը կկազմի 282,200 ՀՀ դրամ։

Հաշվի առնելով այն, որ որոշման նախագիծը չզեկուցվող է, ուստի այն չի քննարկվի ավագանու նիստի ընթացքում, այլ միանգամից կդրվի քվեարկության։

Արփի Հակոբյան