23.11.2024 | 00:35
Թրամփի հետ հեռախոսազրույցը տեղեկատվական էր, բայց նաև շատ պոզիտիվ. Փաշինյան. ՏԵՍԱՆՅՈՒԹ
Ինչ բառերով է Փաշինյանը շնորհավորում Պուտինին․ վարչապետի ուղերձները՝ 2018-ից մինչ օրս
Քաղաքականություն
07.10.2024 | 18:45
Այսօր Վլադիմիր Պուտինը նշում է ծննդյան 72-ամյակը․ Նիկոլ Փաշինյանը շնորհավորական ուղերձ է հղել Ռուսաստանի Դաշնության նախագահին։ Factor.am-ն ուսումնասիրել է, թե 2018-ին իշխանության գալուց հետո ամեն տարի հոկտեմբերի 7-ին Փաշինյանն ինչ ձևակերպումներով և շեշտադրումներով է մաղթանքներ հղել Պուտինին։
Այս տարի վարչապետը իր ուղերձում մի քանի շեշտադրումներ է արել «փոխշահավետ փոխգործակցության ակտիվացման, վստահության և երկու պետությունների ընդհանուր շահերի վերաբերյալ»։
2024
«Հարգելի Վլադիմիր Վլադիմիրի,
Ընդունեք անկեղծ շնորհավորանքներս և լավագույն բարեմաղթանքներս՝ Ձեր ծննդյան օրվա առիթով։ Կարծում ենք, որ այս փուլում առանձնահատուկ շեշտվում է Հայաստանի Հանրապետության և Ռուսաստանի Դաշնության միջև փոխշահավետ համագործակցության ամրապնդմանն ուղղված հետևողական գործունեության անհրաժեշտությունը՝ փոխադարձ հետաքրքրություն ներկայացնող բոլոր ոլորտներում։ Ակնկալում եմ Երևանի և Մոսկվայի միջև փոխշահավետ փոխգործակցության համատեղ ակտիվացում, ինչպես նաև փոխըմբռնման, վստահության և մեր պետությունների շահերը հաշվի առնելու վրա հիմնված բազմաշերտ երկխոսության զարգացում։
Մաղթում եմ Ձեզ, հարգելի Վլադիմիր Վլադիմիրի, առողջություն, հաջողություններ և ամենայն բարիք», – ասված է Փաշինյանի ուղերձում։
Եթե այսօր Փաշինյանը որոշել է ջերմ մաղթանքներով շնորհավորական ուղերձ հղել, ապա 2023-ին ՀՀ ղեկավարի անունից պաշտոնական ուղերձի տեքստ չէր հրապարակվել, վարչապետի մամուլի գրասենյակը հայտնել էր միայն հեռախոսազրույցի մասին և միայն մեկ տողով հիշատակել ծննդյան օրվա մասին։ Փաստորեն, սա միակ տարին էր, որ Պուտինը Փաշինյանից ծննդյան ուղերձ չստացավ։
2023
«Տեղի է ունեցել վարչապետ Նիկոլ Փաշինյանի հեռախոսազրույցը ՌԴ նախագահ Վլադիմիր Պուտինի հետ: Քննարկվել են Լեռնային Ղարաբաղի հայության բռնի տեղահանությունից հետո ստեղծված իրավիճակը, երկկողմ օրակարգի մի շարք հարցեր: Վարչապետ Փաշինյանը ՌԴ նախագահին շնորհավորել է ծննդյան օրվա առիթով»:
2022-ի ուղերձում Փաշինյանը հիշատակել էր Պուտինի՝ «որպես պետական և քաղաքական գործչի հարուստ փորձը, անվիճելի համարել Արցախում հրադադարի հասնելու ՌԴ նախագահի ջանքերը, բարձր գնահատական տվել երկու երկրների դաշնակցային գործընկերությունը»։
2022
«Հարգելի Վլադիմիր Վլադիմիրի,
Սրտանց շնորհավորում եմ Ձեզ հոբելյանի առթիվ։ Պետական և քաղաքական գործչի Ձեր ողջ հարուստ փորձը ուղղված է ռուսաստանյան պետականության ամրապնդմանը, երկրի տնտեսական զարգացմանը և Ռուսաստանի ժողովրդի բարեկեցության բարելավմանը: Հայաստանում բարձր են գնահատում Ձեր վերաբերմունքը Հայաստանի և հայ ժողովրդի շահերին վերաբերող հարցերին, և այս համատեքստում անվիճելի են Լեռնային Ղարաբաղի հակամարտության գոտում հրադադարի հասնելուն ուղղված Ձեր ջանքերը։ Ակնկալում եմ կառուցողական երկխոսության շարունակականություն և համատեղ ակտիվ աշխատանք մեր երկրների միջև դաշնակցային գործընկերության ներկապնակի հարստացման և ռազմավարական պայմանավորվածությունների իրականացման ուղղությամբ՝ ի շահ մեր ժողովուրդների և պետությունների: Վստահ եմ, որ համատեղ ջանքերով հնարավոր է հասնել Հարավային Կովկասի տարածաշրջանում երկարաժամկետ խաղաղության, կայունության և անվտանգության, հաստատել վստահության մթնոլորտ։
Հարգելի Վլադիմիր Վլադիմիրի,
Սրտանց մաղթում եմ Ձեզ քաջառողջություն, բարօրություն և ամենայն բարիք»:
2021-ին Փաշինյանը կրկին անդրադարձել էր Պուտինի՝ որպես ղեկավարի որակներին և «դաշնակցային հարաբերությունների ամրապնդմանը»։
2021
«Հարգելի Վլադիմիր Վլադիմիրի,
Ընդունեք անկեղծ շնորհավորանքներս Ձեր ծննդյան օրվա առթիվ: Ռուսաստանի Դաշնության զարգացման շահերից բխող նպատակների իրագործմանը միտված պետական և քաղաքական գործունեության հարուստ փորձը, ինչպես նաև համաշխարհային ասպարեզում երկրի դերի առավել ամրապնդմանը միտված Ձեր հետևողական ջանքերը Ձեզ արժանի հարգանք են ապահովել հայրենիքում և արտերկրում: Անվիճելի է Ձեր անձնական ներդրումը Ռուսաստանի և Հայաստանի միջև դաշնակցային հարաբերությունների ամրապնդման գործում: Երախտապարտ ենք Հարավային Կովկասում երկարաժամկետ և կայուն խաղաղության հաստատմանն ուղղված Ձեր ջանքերի համար: Անկեղծորեն գնահատում եմ մեր միջև ձևավորված փոխըմբռնումը և վստահելի հարաբերությունները: Հարգելի Վլադիմիր Վլադիմիրի, մաղթում եմ Ձեզ քաջառողջություն, երջանկություն և նորանոր հաջողություններ Ձեր պատասխանատու պաշտոնում»:
2020-ին Փաշինյան-Պուտին հերթական հեռախոսազրույցներից մեկը ՌԴ նախագահի ծննդյան օրն էր, 44-օրյա պատերազմի ամենաթեժ պահին։
2020
«Վարչապետ Նիկոլ Փաշինյանը հերթական հեռախոսազրույցն է ունեցել ՌԴ նախագահ Վլադիմիր Պուտինի հետ: Վարչապետ Փաշինյանը շնորհավորել է նախագահ Պուտինին ծննդյան տարեդարձի կապակցությամբ: Նա ջերմ բարեմաղթանքներ է հղել այդ առթիվ՝ հաջողություն ցանկանալով նրան պետության ղեկավարի բարձր առաքելությունն իրականացնելու գործում։ Կողմերը նաև քննարկել են իրավիճակը Լեռնային Ղարաբաղում՝ կարևորելով ռազմական գործողությունների շուտափույթ դադարեցումը»:
2019 թվականին Պուտինը Եվրասիական տնտեսական բարձրագույն խորհրդի նիստի շրջանակում այցելել էր Հայաստան։ 2019-ի շնորհավորական ուղերձում Փաշինյանը հիշատակել էր այդ մասին և շնորհակալություն հայտնել պաշտոնական այցով Ռուսաստան այցելելու հրավերի համար։ Այդ տարվա բարեմաղթանքներում Փաշինյանը հիշել էր նաև Պուտինի հարազատներին ու մտերիմներին։
2019
«Հարգելի Վլադիմիր Վլադիմիրի,
Ընդունեք սրտանց շնորհավորանքներս Ձեր ծննդյան օրվա առթիվ: Մաղթում եմ Ձեզ հաջողություններ պետության ղեկավարի առաքելության իրականացման և Ձեր բոլոր ծրագրերի ու գաղափարների կյանքի կոչման գործում: Շատ ուրախ էի, որ առիթ ունեցա հյուրընկալել Ձեզ Հայաստանում՝ Բարձրագույն Եվրասիական տնտեսական խորհրդի նիստի շրջանակում: Մեր երկկողմ հանդիպումը Երևանում և դրա շրջանակում ձեռք բերված պայմանավորվածությունները հաստատում են փոխըմբռնման և բարեկամության բարձր մակարդակը, որը բնորոշ է մեր երկրների և ժողովուրդների միջև դաշնակցային հարաբերություններին: Շնորհակալ եմ պաշտոնական այցով Ռուսաստան այցելելու հրավերի համար: Վստահ եմ, որ համատեղ ջանքերով մեզ կհաջողվի առավել ամրապնդել մեր երկրների միջև ռազմավարական գործընկերությունը և գտնել նոր ուղիներ դրա հետագա կատարելագործման համար` ժամանակակից պահանջներին և աշխարհում տեղի ունեցող փոփոխություններին համապատասխան: Հարգելի Վլադիմիր Վլադիմիրի, անկեղծորեն մաղթում եմ Ձեզ և Ձեր հարազատներին ու մտերիմներին քաջառողջություն, բարօրություն և երջանկություն»:
2018-ին դեռ իշխանությունը նոր ստանձնած Փաշինյանի ուղերձը հարուստ էր երախտագիտության դրսևորումներով, դաշնակցային հարաբերությունների մասին հիշատակումներով։
2018
«Հարգելի Վլադիմիր Վլադիմիրի,
Ընդունեք սրտանց շնորհավորանքներս Ձեր ծննդյան օրվա առթիվ և հաջողության անկեղծ մաղթանքներս Ռուսաստանի եղբայրական ժողովրդին ծառայելու գործում։ Համոզված եմ, որ պետական և քաղաքական գործունեության Ձեր հարուստ փորձը, սահմանված նպատակներին հասնելու հարցում սկզբունքայնությունը և հետևողականությունը հետայսու ևս նպաստելու են ռուսական պետականության ամրապնդմանը: Հայաստանում բարձր են գնահատում Ձեր անձնական ներդրումը հայ-ռուսական դաշնակցային հարաբերությունների զարգացման և ամրապնդման գործում։ Այդ հարաբերությունները հիմնված են մեր երկրների ժողովուրդների բարեկամության և փոխադարձ վստահության դարավոր ավանդույթների վրա: Այս համատեքստում ես հատկապես գնահատում եմ մեր միջև հաստատված անձնական հարաբերությունները, որոնք, անշուշտ, լրացուցիչ ազդակ են հաղորդում բոլոր ոլորտներում հայ-ռուսական համագործակցության շարունակական զարգացմանը, այդ թվում նաև բազմակողմանի հարթակներում և ինտեգրացիոն գործընթացների շրջանակներում: Գոհունակությամբ եմ արձանագրում, որ մեր երկրների միջև համագործակցության խորացման փոխադարձ շահագրգռվածությունը թույլ կտա հետագայում ևս օգտագործել Հայաստանի և Ռուսաստանի միջպետական համագործակցության զգալի ներուժը՝ հարստացնելով հայ-ռուսական ռազմավարական հարաբերությունները, ինչպես նաև նպաստելով մեր տարածաշրջանում կայունության և անվտանգության ամրապնդմանը: Հարգելի՛ Վլադիմիր Վլադիմիրի, մաղթում եմ Ձեզ քաջառողջություն, երջանկություն, բարեկեցություն և հաջողություն Ձեր բոլոր նախաձեռնություններում»:
Հետաքրքրական է, որ ՌԴ նախագահի ծննդյան օրը ԱՊՀ երկրների ղեկավարների հանդիպումներն արդեն ավանդույթ են դարձել։ Պուտինը հաճախ հենց այդ օրն է ընտրում ԱՊՀ պետությունների ղեկավարների խորհրդի նիստերի, տարբեր արարողությունների և այլ հանդիպումների կազմակերպման համար։ Այս օրը ևս բացառություն չէ․ Նիկոլ Փաշինյանը Մոսկվայում է ԱՊՀ պետությունների ղեկավարների խորհրդի հերթական նիստին մասնակցելու նպատակով։
Անի Թամրազյան
