ԱԺ-ն չարաշահումների գործով անցնող «Ֆլեշ»-ից բենզին կգնի

Չարաշահումների գործով անցնող «Ֆլեշ» ընկերությունից ԱԺ-ն բենզին կգնի։

Կառավարության այսօրվա նիստում չզեկուցվող հաստատեց 2024-ի բյուջեով ԱԺ ընդհանուր հատկացումների վերաբաշխումների մասին հարցը։

Կառավարության հիմնավորման մեջ նշվում է, որ «Ռեգուլյար» տեսակի բենզինի գնման պայմանագիրը կնքվել է «Ֆլեշ» ՍՊԸ-ի հետ։ Նշենք, որ այս ընկերության հիմնադիրը Բարսեղ Բեգլարյանն է։ Ըստ կառավարության հիմնավորման՝ ԱԺ-ն 27 մլն դրամի բենզին կգնի «Ֆլեշ»-ից։

Հիշեցնենք, որ Բարսեղ Բեգլարյանն անցնում է երրորդ նախագահ Սերժ Սարգսյանին առնչվող քրեական գործով․ նրան մեղադրանք է առաջադրված մոտ կես միլիարդ դրամ գումարի հափշտակությունը կազմակերպելու համար։

Ըստ մեղադրանքի՝ 2013 թվականի հունվարի 24-ի որոշմամբ Հայաստանի կառավարությունը հաստատել է հողօգտագործողներին գարնան գյուղատնտեսական աշխատանքների համար մատչելի գներով դիզելային վառելանյութի ձեռքբերման նպատակով պետական աջակցության ծրագիրը: Դրա շրջանակում նախատեսվել է մարզպետարանների և Գյուղատնտեսության նախարարությանը պատկանող կազմակերպությունների ներկայացրած հայտերի հիման վրա հողօգտագործողներին վաճառել ավելի քան 17 միլիոն լիտր դիզելային վառելիք: Վառելիք մատակարարելու ցանկություն են հայտնել «Մաքսհուր» և «Ֆլեշ» ընկերությունները:Շ

Ըստ ՀՔԾ հաղորդագրության՝ ամենաէժան գնային առաջարկը ներկայացրել է «Մաքսհուր» ընկերությունը, որի ներկայացուցչի հետ քննարկումներից հետո Գյուղատնտեսության նախարարության պաշտոնատար անձանց կողմից որոշվել է որպես մատակարար հենց այս ընկերության տվյալները ներկայացնել կառավարության հաստատմանը: Համաձայն ՀՔԾ- հաղորդագրության՝ Սերժ Սարգսյանը տեղյակ է եղել, որ ավելի էժան գնով վառելիք է առաջարկում «Մաքսհուր» ընկերությունը, բայց որպես մատակարար ընտրել է «Ֆլեշ» ընկերությանը և պայմանագիր է կնքել։

Մանյա Պողոսյան