20.02.2026 | 12:00
Ալիևի թիկնապահները Վաշինգտոնում ընդդիմադիրների են ծեծել // Թրամփն Իրանին 15 օր ժամանակ է տվել․ ԼՈՒՐԵՐ
Երևանի թիվ 19 դպրոցում աշակերտներին տարհանել են, երեխաներից մեկը տարայից գազային նյութ է փչել
01.10.2024 | 11:32
Երևանի Նիկոլ Աղբալյանի անվան թիվ 19 դպրոցում առավոտյան աշակերտներին տարհանել են, երեխաներն այժմ դպրոցի բակում են, այս մասին Factor.am-ին հայտնեցին դպրոցից։ 7-րդ դասարանի աշակերտներից մեկը գազային նյութ է փչել, որի հետևանքով որոշ երեխաների մոտ շնչառական խնդիրներ են առաջացել։
Դպրոցից փոխանցեցին, որ անմիջապես ոստիկանություն, փրկարար ծառայություն և ԱԻՆ են զանգահարել։ Ոստիկաններն այժմ տնօրենի սենյակում են և անհրաժեշտ գործողություններ են իրականացնում։
«Մենք այդ նյութը նկարել ենք և անմիջապես փրկարար ծառայություն ենք ուղարկել, ասել են՝ մի անհանգստացե՛ք, այդ նյութի ազդեցությունը 20 րոպե է տևում և վտանգավոր չէ։ Այնուամենայնիվ, ասեցինք, որ գան դպրոցի շենքն ախտահանեն, նոր երեխաները ներս մտնեն։ Երեխային հարցրեցինք՝ ինչ է, ասում է, իբրև, դա գնել է, փոքրիկ իր է, փչովի, նյութի բաղադրությունը գրված էր վրան։ Հիմա ոստիկանները տեղում են և թող պարզեն՝ ինչ է եղել»,- նշեցին դպրոցից։
ՆԳՆ ոստիկանությունից էլ Factor.am-ին հաղորդեցին, որ Երևանի թիվ 19 դպրոցում աշակերտներից մեկը, ըստ նախնական տվյալների, նյութ է փչել, ինչը աշակերտների շրջանում հազ է առաջացրել։
Իրավապահ կառույցից նշել են, որ անչափահասը ներկայացվել է ոստիկանության կենտրոնական բաժին, հանգամանքները պարզվում են։
Մանյա Պողոսյան
