15.07.2026 | 00:59
ԱԱ-2026․ Իսպանիան հաղթեց Ֆրանսիային և դուրս եկավ եզրափակիչ․ ՏԵՍԱՆՅՈՒԹ
Ալեն Սիմոնյանի և ՔՊ պատգամավորների այցը Կանադա հետաձգվել է
23.09.2024 | 14:10
ԱԺ նախագահ Ալեն Սիմոնյանի և «Քաղաքացիական պայմանագիր» խմբակցության մի քանի պատգամավորների այցը Կանադա հետաձգվել է, այս մասին Factor.am-ին տեղեկացրեց ԱԺ նախագահի մամուլի խոսնակ Մովսես Հարությունյանը։
«Այցը հետաձգվել է Կանադայում ստեղծված քաղաքական ճգնաժամի պատճառով։ Կանադայում կոալիցիոն ուժերից մեկը լքել է կոալիցիան ու երկրում ներքաղաքական ճգնաժամ է։ Կանադայի խորհրդարանի Համայնքների պալատի նախագահը զանգել է պարոն Սիմոնյանին ու խնդրել այցի ժամկետները հետաձգել՝ ներքաղաքական իրավիճակով պայմանավորված։ Պարոն Սիմոնյանը տվել է համաձայնություն, իրավիճակի հանգուցալուծմամբ պայմանավորված էլ կքննարկվեն հետաձգված այցի ժամկետները»,- պազաբանեց խոսնակը։
Հիշեցնենք, որ միջպետական հարաբերությունների զարգացման շրջանակներում սեպտեմբերի 25-30-ը նախատեսվում է ՀՀ Ազգային ժողովի նախագահ Ալեն Սիմոնյանի և ԱԺ պատվիրակության այցելությունն Օտտավա։
Հավելենք նաև, որ ՀՅԴ Կանադայի Կենտրոնական կոմիտեն հայտարարել էր, որ Ալեն Սիմոնյանի ու ՔՊ պատգամավորներից կազմված պատվիրակության այցն իրենք չեն ողջունում։ Այդ հայտարարության մեջ նշված է․«Կանադահայությունը մտադրություն չունի ողջունելու ժողովրդավարության տարրական սկզբունքներն ու մարդու հիմնական իրավունքները ոտնահարող ՀՀ գործող վարչախմբի այցելությունը»։
Նկատենք, որ Օտտավա նախատեսված այցում հայ-կանադական բարեկամական խմբի ընդդիմադիր պատգամավորներն ընդգրկված չեն եղել։
Մանյա Պողոսյան
