Երևանի քաղաքապետարանն օրե՞նք է խախտել․ պատասխանատուները պնդում են՝ տեխնիկական վրիպակ է

«Քաղաքաշինության մասին» օրենքի անցումային դրույթների համաձայն՝ այն բնակավայրերը, որոնք մինչև 2024-ի հուլիսի 1-ը չեն ունենա գլխավոր հատակագիծ, պետք է դադարեցնեն քաղաքաշինական գործունեությունը, այսինքն՝ այդ համայնքներում արգելվում է տրամադրել նախագծման թույլտվություն (ճարտարապետահատակագծային առաջադրանք) և օտարել հողամասեր։

Երևանի գլխավոր հատակագիծն ընդունվեց սեպտեմբերի 10-ին։ Այսինքն՝ հուլիսի 1-ից մինչև սեպտեմբերի 10-ը Երևանի քաղաքապետարանը կամ վարչական շրջանները իրավունք չունեին տրամադրել նախագծման թույլտվություններ և կառուցապատման նպատակով հողատարածքներ։

Մինչդեռ, Factor.am-ն արձանագրեց, որ քաղաքապետարանի կայքում զետեղված է տեղեկատվություն, որ հուլիսին տրամադրվել է 40 նախագծման թույլտվություն և նույնիսկ ներկայացված է բացվածքը, թե որ վարչական շրջանում քանի նախագծման թույլտվություն է տրվել։ Նույն փաստաթղթի ներքևում առկա էր տեղեկություն հուլիսին տրամադրված շինթույլտվությունների և ավարտական ակտերի վերաբերյալ։

Factor.am-ը քաղաքապետարանից հետաքրքրվեց՝ ինչպե՞ս է Երևանի քաղաքապետարանը 2024 թ․ հուլիսի ընթացքում տրամադրել 40 նախագծման թույլտվություն, եթե «Քաղաքաշինության մասին» ՀՀ օրենքով դա արգելված է, նաև քանի՞ նախագծման թույլտվություն և հողամաս է տրամադրվել մինչև սեպտեմբերի 9-ը։

Ի պատասխան՝ քաղաքապետարանից տեղեկացրել ենք,  թե հուլիս, օգոստոս և սեպտեմբեր ամիսներին նախագծման թույլտվություններ չեն տրամադրվել, կառուցապատման նպատակով հողի օտարման որոշում չի կայացվել։

«Հայտնում ենք, որ քաղաքապետարանի Yerevan.am պաշտոնական կայքի «Դույինգ բիզնես» («Doing Business») բաժնում հուլիս ամսվա ընթացքում տրված նախագծման թույլտվությունների վերաբերյալ տեղեկատվության տեղադրումը տեխնիկական վրիպակ է: Հայցում ենք Ձեր ներողամտությունը և շնորհակալություն հայտնում Ձեր դիտարկման համար: Միաժամանակ տեղեկացնում ենք, որ Yerevan.am կայքում համապատասխան շտկումն արդեն արված է»,- նշված է քաղաքապետարանի պատասխանում:

Քաղաքապետարանի կայքում հուլիսին տրամադրված նախագծման թույլտվությունների քանակն այս պահին դարձել է 0 և, փաստաթուղթը ներբեռնելիս, ըստ վարչական շրջանների վիճակագրության էջը նույնպես բացակայում է։

Արդյո՞ք քաղաքապետարանն, իրոք, տեխնիկական վրիպակ էր թույլ տվել, թե՞ իրականում նախագծման թույլտվություններ տրամադրվել են, և «վրիպակ» է եղել այդ տեղեկությունը հրապարակելը։ Այս հարցն արդեն իրավապահների և վերահսկող մարմինների իրավասության տիրույթում է։

Գայանե Խաչատրյան