Քաղաքականություն
11.09.2018 | 15:17Փաշինյան-Պուտին մոսկովյան հանդիպման ընթացքում որևէ դրամատիկ իրադարձություն տեղի չունեցավ, վարչապետ Փաշինյանի դրամադրությունը լավ էր հանդիպումից հետ և, ըստ իր հաղորդման, բոլոր հարցերը քննարկվել են, որոնք կա՛մ գտել են լուծումներ, կա՛մ գտնվում են դրանց ճանապարհին․ իհարկե սա դեպի բացարձակություն տանել չի կարելի, քանի ոչ չեն կարող հարցեր չլինել։
Այս մասին այսօր հրավիրված մամուլի ասուլիսի ժամանակ ասաց քաղաքագիտության դոկտոր Հայկ Մարտիրոսյանը՝ շեշտելով, որ բոլոր խնդիրների լուծումները պետք է փնտրել ոչ թե Ռուսաստանում, այլ Հայաստանում։
«Քանի դեռ Հայաստանում չկա կայունություն, ներքաղաքական կյանքը գնալով անկայունանում է, նոր և հակառակ ալիքներ են առաջանում իշխանությանը և հետևաբար ժողովրդին։ Այս հարցին վարչապետը երեկ Էրեբունիում անդրադարձավ՝ նույնպես հաստատելով, որ երկրում կայունություն չկա։ Ցավոք սրտի, սա չափազանց մտահոգիչ է և քանի դեռ ՀՀ գործադիր իշխանությունն իրավիճակը չի վերցնում իր լիակատար վերահսկողության ներքո, չի ազդում նաև գործող մյուս ուժերի վրա, քանի դեռ առաջնորդվում է ոչ շատ իրատեսական ուղով, ՀՀ-ում անկայունությունը մեծանալու է»,- ասաց քաղաքագետը։
Վերջինս նշեց, որ անհրաժեշտ են կտրուկ միջոցներ, իսկ քանի դեռ չկա գործադիր իշխանության մեկ անվերապահ կենտրոն, ապա կարող են խնդիրներ լինել նաև դրսի ուժերի հետ:
«Պետք է լինի մեկ կենտրոն, որը խոսելու է դրսի հետ, իսկ դա պետք է լինի Կառավարությունը և վարչապետը, եթե այս իրավիճակը չենք ապահովում, ապա մտնում ենք ռիսկային ջրեր, այն առումով, որ երկրում կարող են ինչ-որ պահի սկսվել ցնցումներ»,- ասաց Հայկ Մարտիրոսյանը։
Նա անդրադարձավ նաև Սերժ Սարգսյանի եղբորորդուն 50 մլն դրամ գրավի դիմաց ազատ արձակելու մասով դատարանի որոշմանը և շեշտեց, որ օգոստոսի 17-ի հանրահավաքից հետո փաստորեն ոչ մի դատավոր խելքը գլուխը չհավաքեց և ստացվում է հետևյալը․ «Փաշինյանը զանգեր չի կատարում, այդ զանգերն ուղղակի կամ փոխաբերական իմաստով կատարում են այլ կենտրոններից»:
Մանրամասները՝ տեսանյութում։
