«Երկրի ճակատագիրը կանխորոշում են ոչ թե իրադարձությունները, այլ մարդը»,- այս համոզման է գրող, գրականագետ Հովիկ Չարխչյանը: Այսօր տեղի ունեցավ Չարխչյանի «Երկիր անավարտ» վեպի շնորհանդեսը: Հեղինակը գիրքը գրել է 3 ու կես տարում:
«Սուլամիթա. Սևակի մեծ սերը», «Սևակի մահվան առեղծվածը» «Չարենցի կրակոցը» և այլ հայտնի վեպերի հեղինակը նշում է` «Երկիր անավարտ»-ը մեր բոլորի և յուրաքանչյուրի մասին է. «Ցանկացած մեկն այնտեղ կարող է գտնել իրեն, իր հույզերը, իր մտքերն ու մտատանջությունները, իր կասկածներն ու համոզմունքները: Երկրի ճակատագիրը կանխորոշում են ոչ թե իրադարձությունները, այլ մարդը, որն իր պատկերացումներով և դրանցից բխող արարքներով ծնունդ է տալիս ընթացքին՝ շարունակելով մնալ այն համոզման, թե առանձին անհատը չի կարող մեծ ցնցումների շարժառիթ հրահրել: Բայց վրա է հասնում փլուզումների ու նահանջի ժամանակը, և նա հարկադրաբար առերեսվում է իրականության հետ, որի ձևավորման մի մասնակիցն էլ ինքն է եղել»:
Չարխչյանը շեշտում է` երկիրն անավարտ է մնում այնքան ժամանակ, քանի դեռ անկատար ու թերի է մարդկային էությունը: Նրա խոսքով` «Երկիր անավարտ» վեպը նպատակ ունի երեք ժամանակային հարթություններում ցուցադրել մարդ-երկիր փոխհարաբերությունների խորքային խմորումները, պատճառահետևանքային այն կապը, որ սովորաբար քողարկվում է այլևայլ դրսևորումներով, սակայն ի վերջո ի հայտ պիտի գա որպես արդյունք, հատուցում ու վերջնահաշվարկ:
Վեպի անվան մեջ «երկիր» բառը, ըստ հեղինակի` երկակի կարելի է հասկանալ` երկիր` տեղային, նեղ իմաստով, և երկիր` որպես մոլորակ. «Աշխարհը կմնա անկատար ու անավարտ, քանի դեռ դրա հիմքերը ամուր չեն, իսկ հիմնաքարը դնում ենք մենք՝ բոլորս ու յուրաքանչյուրս: Մեր ամեն մի վրիպում խարխլում է մարդկության և երկրի մեծ տան պատերի ամրությունը»,- ասում է նա:
Աննա Բաբաջանյան
