23.11.2024 | 20:00
Չի ներկայացվել գույքի և ունեցվածքի 509 հայտարարագիր՝ 4 տարում․ ի՞նչ է սպասվում օրինախախտներին. ՔՆՆԱՐԿՈՒՄ
Աննա Դանիբեկյանի լիազորությունները դադարեցնելուց երկու ամիս անց Արմեն Գևորգյանի գործը դեռևս չի մակագրվել այլ դատավորի
Հասարակություն
11.09.2024 | 10:15
Հայաստանի նախկին փոխվարչապետ Արմեն Գևորգյանի վերաբերյալ քրեական գործն Աննա Դանիբեկյանի լիազորությունները դադարեցնելուց հետո դեռևս չի մակագրվել այլ դատավորի։ Այս մասին Factor.am-ի հարցին ի պատասխան հայտնում են Երևանի քրեական դատարանից։
Նշենք, որ մոտ 2 ամիս առաջ՝ հուլիսի 15-ին, Բարձրագույն դատական խորհուրդը դադարեցրել է Արմեն Գևորգյանի գործը քննող դատավոր Աննա Դանիբեկյանի լիազորությունները՝ նրան մեղադրելով Հայաստանի երկրորդ նախագահ Ռոբերտ Քոչարյանի գործով ողջամիտ ժամկետ խախտելու մեջ։ Սա կաշառքի վերաբերյալ գործն է, որով անցնում էին Քոչարյանն ու Արմեն Գևորգյանը։ Ստացվում է՝ Աննա Դանիբեկյանի լիազորությունները դադարեցվել են մի գործով ողջամիտ ժամկետ խախտելու մեջ, որը նրա լիազորությունները դադարեցնելուց 2 ամիս անց դեռևս չի մակագրվել։
Հիշեցնենք որ 2023-ի տարեվերջին Ռոբերտ Քոչարյանը համաձայնել է, որ իր նկատմամբ վաղեմության ժամկետն անցած լինելու հիմքով քրեական հետապնդումը դադարեցվի, իսկ Արմեն Գևորգյանի մասով քննությունը շարունակվում էր մինչև Դանիբեկյանի լիազորությունների դադարեցումը։
Արդարադատության նախարարության կողմից ԲԴԽ ներկայացված միջնորդության համաձայն՝ Դանիբեկյանը լսել է պաշտպանների՝ նույնաբովանդակ միջնորդությունները, չի ստուգել նիստին չներկայացած պաշտպաններից մեկի կողմից հայտնած այն տեղեկությունը, որ կորոնավիրուսով վարակակրի հետ է շփվել, միջնորդությունների քննության համար հեռացել է խորհրդակցական սենյակ՝ որոշում կայացնելու և հետաձգել դատական նիստերը։ Բարձրագույն դատական խորհուրդն էլ համարել է, որ Դանիբեկյանի կողմից թույլ տրված խախտում անհամատեղելի է դատավորի կարգավիճակի հետ և հեղինակազրկում է դատական համակարգը։
Իսկ ո՞վ պետք է հետևի ողջամիտ ժամկետներում գործի քննության ժամկետներ խախտելու համար լիազորությունները դադարեցված դատավորի վարույթում առկա գործերի ողջամիտ ժամկետներում մակագրման գործընթացին, պարզ չէ։
Արաքս Մամուլյան
