30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Ադրբեջանի ԱԳՆ-ն արձագանքել է Արարատ Միրզոյանի հայտարարություններին
Քաղաքականություն
09.09.2024 | 20:24
Ադրբեջանի ԱԳՆ խոսնակ Այխան Հաջիզադեն արձագանքել է խաղաղության պայմանագրի վերաբերյալ ՀՀ ԱԳ նախարար Արարատ Միրզոյանի հայտարարություններին։
Հաջիզադեն նշել է, թե, իբր, «հայկական կողմը հերթական անգամ փորձում է հասարակության կարծիքը շեղել իրական իրավիճակից»: Նա ասել է, որ հայկական կողմն Ադրբեջանի և Հայաստանի միջև խաղաղության և միջպետական հարաբերությունների հաստատման մասին համաձայնագրի նախագծի իր մեկնաբանությունն ուղարկել է օգոստոսի վերջին։
«Ադրբեջանի կողմից ներկայացված մեկնաբանություններին համարժեք արձագանքելու փոխարեն՝ հայկական կողմը փորձեց աչք փակել խնդիրների վրա՝ հանելով այն դրույթները, որոնք պետք է արտացոլվեն նախագծում։ Թեև ծրագրի շատ դրույթներ մինչ այժմ համաձայնեցված են, այսինքն՝ մոտավորապես 80%-ը, որոշ դրույթներ դեռ համաձայնեցված չեն: Սակայն դա չի նշանակում, որ համաձայնագիրը պետք է ստորագրվի՝ նախագծից հանելով չհամաձայնեցված դրույթները, ինչպես առաջարկում է հայկական կողմը։ Սա չի կարելի ընդունելի համարել։ Որպեսզի խաղաղության պայմանագիրը լինի կայուն և հաջողակ, նախագծում պետք է հստակեցվեն երկու երկրների միջև խնդրահարույց խնդիրները մի շարք ուղղություններով»,-ասել է Հաջիզադեն։
Նա կրկնել է Բաքվի թեզերը՝ հայտարարելով, որ «Հայաստանը շարունակում է իր տարածքային հավակնությունները Ադրբեջանի դեմ և փորձում է վերականգնել անցյալ հակամարտության մնացորդ հանդիսացող Մինսկի խմբի աշխատանքը՝ դրանով նեղացնելով խաղաղության համաձայնագրի տեքստը և կոչ է անում ստորագրել այն»։
«Համաձայնագրի նախագիծը ստորագրելու համար Հայաստանը պետք է առաջին հերթին համապատասխան փոփոխություններ կատարի իր Սահմանադրության մեջ, որտեղ այժմ խոսվում է մեր երկրի նկատմամբ տարածքային պահանջների մասին։ Թեև Հայաստանը գիտի, որ կան գրավոր և ստորագրված պարտավորություններ՝ կապված Ադրբեջանի արևմտյան շրջանները Նախիջևանի Ինքնավար Հանրապետության հետ կապող հաղորդակցությունների բացման հետ, սակայն վերջին 4 տարում դրանք չի կատարել։ Ինչ վերաբերում է երկու երկրների տարածքում օտարերկրյա մասնավոր ընկերության ներգրավման մասին կարծիքներին, ապա նկատենք, որ Ադրբեջանը երբեք չի քննարկել իր տարածքում երրորդ կողմի ներգրավվածությունը։ Եթե հայկական կողմն իսկապես շահագրգռված է տարածաշրջանում հաղորդակցությունների բացմամբ, ապա նա պետք է կատարի իր պարտավորությունները»,- ասվում է հայտարարության մեջ։
