12.01.2026 | 19:53
Մեկնարկում է շախմատի Հայաստանի առաջնությունը․ առաջին տուրի զույգերը հայտնի են
ԲԴԽ-ն նախագահին առաջարկել է Վերաքննիչ քրեական դատարանում դատավոր նշանակել Հարություն Պետրոսյանին
Հասարակություն
03.09.2024 | 18:12
Բարձրագույն դատական խորհուրդը որոշել է Վերաքննիչ քրեական դատարանի դատավոր նշանակելու համար Հանրապետության նախագահին առաջարկել Արարատի և Վայոց ձորի մարզերի ընդհանուր իրավասության դատարանի նախագահ Հարություն Պետրոսյանի թեկնածությունը։ Այս մասին տեղեկանում ենք Բարձրագույն դատական խորհրդի կայքից։
Դատական օրենսգրքի համաձայն՝ Վերաքննիչ դատարանում թափուր հաստիք առաջանալու դեպքում Բարձրագույն դատական խորհուրդը որոշում է կայացնում թեկնածուին առաջարկություն ներկայացնելու վերաբերյալ, և Դատական դեպարտամետը եռօրյա ժամկետում գրավոր առաջարկություն է ներկայացնում թեկնածուին։
Թեկնածուն ծանուցումը ստանալու պահից մեկշաբաթյա ժամկետում պարտավոր է ԲԴԽ ներկայացնել իր գրավոր համաձայնությունը կամ հայտնել անհամաձայնությունը նշանակման վերաբերյալ: Այդ ժամկետում համաձայնություն չտալը դիտվում է որպես անհամաձայնություն: Եվ միայն թեկնածուի համաձայնության դեպքում արդեն ԲԴԽ-ն որոշում է կայացնում նշանակման համար նրա թեկնածությունն առաջարկել Հանրապետության նախագահին։
Այս կարգավորումներից բխում է, որ Հարություն Պետրոսյանը համաձայնել է, որպեսզի իր թեկնածությունն առաջադրվի որպես Վերաքննիչ քրեական դատարանի դատավոր։
Նշենք, որ երեկ՝ սեպտեմբերի 2-ին, պաշտոնավարման տարիքը լրանալու կապակցությամբ դադարել են Վերաքննիչ քրեական դատարանի դատավոր Մհեր Արղամանյանի լիազորությունները, և այս դատարանում թափուր հաստիք է առաջացել։
Արաքս Մամուլյան
