Երևանի քաղաքապետարանի «Կանաչապատում և շրջակա միջավայրի պահպանություն» ՀՈԱԿ-ի տարածքում հրդեհից հետո պաշտոնյա է վարչական տույժի ենթարկվել

Երևանի քաղաքապետարանի ենթակայությամբ գործող «Կանաչապատում և շրջակա միջավայրի պահպանություն» ՀՈԱԿ-ի պաշտոնյան ենթարկվել է վարչական տույժի՝ արտադրության և սպառման թափոնները բնական միջավայրում, բնակավայրերում այրելու հատկանիշներով։ Այս մասին Factor.am-ի գրավոր հարցմանն ի պատասխան հայտնել են Բնապահպանության և ընդերքի տեսչական մարմնից։

Հիշեցնենք՝ հուլիսի 18-ին Երևանի քաղաքապետարանի ենթակայությամբ գործող «Կանաչապատում և շրջակա միջավայրի պահպանություն» ՀՈԱԿ-ի ջերմոցատնկարանային վարչության բաց տարածքում հրդեհ էր բռնկվել՝ ըստ նախնական վարկածի՝ կայծակից։ ՀՈԱԿ-ի տնօրեն Արմեն Բեգոյանն այդ օրն ասել էր, որ այրում են էտից առաջացած թափոնները։ Իսկ հաջորդ օրը Factor TV-ի հետ զրույցում ասաց՝ տարածքում փոս են փորել, և ոչնչացնում են թափոնները։

Կայծա՞կն է մեծ հրդեհի պառճառը․ հարցը սուր բանավեճի թեմա է դարձել․ ՏԵՍԱՆՅՈՒԹ

Վարչական իրավախախտումների վերաբերյալ ՀՀ օրենքով արգելվում է արտադրության և սպառման, ինչպես նաև տերևաթափից առաջացած թափոնները բնական միջավայրում, բնակավայրերում, դրանց շրջակայքում ու դրանց այրման համար չնախատեսված կաթսայատներում, վառարաններում և այլ սարքերում այրելը։

«Կանաչապատում և շրջակա միջավայրի պահպանություն» ՀՈԱԿ-ի տնօրեն Արմեն Բեգոյանը Factor TV-ին այսօր փոխանցեց, որ տույժի ենթարկված պաշտոնյան ինքը չէ, այլ ՀՈԱԿ-ի տեխնիկատրանսպորտային պարկի պետը, որը նախազգուշացվել է։

«Իր պատասխանատվության ներքո էին թափոնները, չնայած տեսանկարահանող սարքերով երևում է, որ պատճառը կայծակն է։ Պիտի մաս-մաս լցվեր այդտեղ և թույլ չտար այդքան փայտի կուտակում»,- ասաց Բեգոյանը։

ՀՈԱԿ-ի տնօրենն ասաց, որ թափոններն այլևս չեն այրում, պահեստավորել են մինչև մրցույթ կհայտարարեն, սարք կգնեն և կսկսեն աղալ։

Արփի Հակոբյան