13.06.2026 | 10:29
Երկու զինվորական դատախազի նկատմամբ կարգապահական տույժ է կիրառվել՝ գործերի հսկողության թերացումների համար
Մշակույթի գործիչները՝ Երևանի ավագանու թեկնածուներ. ովքե՞ր են նրանք և ի՞նչ ուղի են անցել. ՏԵՍԱՆՅՈՒԹ
Մշակույթ
08.09.2018 | 16:00
Երգիչներ, երգահաններ, ռեժիսորներ ու դերասաններ. Երևանի ավագանու արտահերթ ընտրություններին ընդգրկված ուժերի ներկայացուցիչների շրջանում, ինչպես ավագանու նախկին կազմում, քիչ չեն արվեստի գործիչներն ու մտավորականները:
Նրանք մեծ թիվ են կազմում հատկապես «Իմ քայլը» կուսակցությունների դաշինքի ցուցակում, որ գլխավորում է հենց դերասան և պրոդյուսեր Հայկ Մարությանը: Նույն դաշինքի ցուցակում ընդգրկված է երգիչ Արթուր Իսպիրյանը, որը նաև Հանրային ռադիոյի արխիվի, Կոմիտասի տուն թանգարանի, ազգային երաժշտական գրադարանի թվայնացման բաժնի տնօրենն է, ներկայացված է նաև Հովհաննես Թումանյանի թանգարանի տնօրեն Նարինե Թուխիկյանը, որը լինելով իշխանության ներսում, մշտապես հանդես է եկել ընդդիմադիր դիրքերից՝ չվախենալով սուր քննադատություններ անելուց:
Դաշինքի ցուցակում ընդգրկվածների թվում է երգչուհի, երգահան Լիլիթ Պիպոյանը: Նա մշտապես սուր քննադատության է ենթարկել նախկին իշխանությանը, դեմ է խոսել թայֆայական գործելաոճին:
Ցուցակում ներկայացված է նաև գրող Կարեն Անտաշյանը: Նա զբաղվում է ոչ միայն գրականությամբ, այլև 11 տարի է՝ աշխատում է տուրիզմի ոլորտում:
Նույն ցուցակում ներկայացված է նաեւ «Հովեր» պետական կամերային երգչախմբի երգիչ, «Գոյ» ազգային փորձարարական թատրոնի դերասան Արթուր Մանուկյանը: Ի դեպ, նա եղել է «Քաղաքացիական պայմանագիր» կուսակցության անդամ և կուսակցությունը լքել է այն ժամանակ, երբ Նիկոլ Փաշինյանն արդեն վարչապետ էր:
«Բարգավաճ Հայաստան» կուսակցության ցուցակում արվեստի հետ առնչություն ունեցող անդամների թիվը մեծ չէ: Կարելի է առանձնացել Թաթուլ Ալթունյանի անվան Երգի և պարի անսամբլի երգիչ Վարդան Ասոյանին:
«Երևանի հանրություն» կուսակցությունների դաշինքի ցուցակն էլ գլխավորում է ճարտարապետ Անահիտ Թարխանյանը: Նա պարբերաբար բարձրաձայնել է Հին Երևանի պատմական շենքերը պահպանելու անհրաժեշտության մասին: Անահիտ Թարխանյանը աչքի է ընկել հասարարակական և քաղաքական կյանքում ցուցաբերած ակտիվ դիրքորոշմամբ։
«Ժառանգություն» կուսակցության ցուցակում ևս արվեստի գործիչների առատություն չի նկատվում: Նրանց թվում կարելի է նկատել միայն «Տաղարան» հնագույն երաժշտության համույթի կոնցերտմայստեր Քրիստինե Չթչյանին: Ջութակահարուհին մի առիթով նշել է, որ հենց արվեստագետի զգացմունքային դրդումներն են իրեն տարել դեպի քաղաքականություն:
«Լույս» կուսակցությունների դաշինքի ցուցակում ընդգրկված է Երևանի Ստանիսլավսկու անվան պետական ռուսական դրամատիկական թատրոնի դերասան Ռոբերտ Հակոբյանը, որն, ի դեպ, հավակնում է տվյալ թատրոնի գեղարվեստական ղեկավարի պաշտոնին:
Նույն դաշինքի ցուցակում ընդգրկված է Գաբրիել Սունդուկյանի անվան ազգային ակադեմիական թատրոնի դերասանուհի Սիրանուշ Եսայանը:
«Ռեֆորմիստների» կուսակցության ցուցակում քիչ թվով, բայց կարելի է հանդիպել արվեստագետների: Նրանց թվում է կինոռեժիսոր Արտակ Ավետյանը։ Վերջինս անկուսակցական է, կարծում է, որ իր ոչ քաղաքական անցյալը դրական դեր կունենա։ Ռեժիսորը տարիներ շարունակ կոորդինացրել է մշակութային նախագծեր։
«Ռեֆորմիստների» կուսակցության ցուցակում ընդգրկված են նաև թատերագետ, ռեժիսոր Աշոտ Հակոբյանն ու երաժիշտ Արմեն Քալանթարյանը: Հուսանք, որ նոր ավագանու մտավորական անդամների խոսքն այսուհետ ավելի որոշիչ կլինի և քաղաքի կառավարման հարցում իշխանությունը հաշվի կնստի նրանց տեսակետների հետ:
Աննա Բաբաջանյան
