Սեպտեմբերի 1`առանց 13 դասագրքի. մեկ տարի անց խնդիրը մնում է չլուծված. ՏԵՍԱՆՅՈՒԹ

Մի քանի օրից կմեկնարկի նոր ուսումնական տարին, բայց այս անգամ ևս դասագրքերի տպագրության ուշացումներից հնարավոր չեղավ խուսափել։ Հանրակրթական դպրոցների աշակերտները տարին կսկսեն առանց 13 դասագրքի: 2023-ին էլ տասնյակ դասագրքեր ժամանակին չէին հասել դպրոցներ. մրցույթում կա՛մ հայտ ներկայացնողներ չէին եղել, կա՛մ հաղթողներ:

Դասագրքերի խնդիր կա 2-րդ, 5-րդ, 6-րդ, 7-րդ, 8-րդ և 10-րդ դասարաններում: 2-րդ դասարանում առկա չէ «Ռուսաց լեզու», 5-րդ և 6-րդ դասարաններում՝ «Ֆրանսերեն», 7-րդում՝ «Ֆրանսերեն», «Թվային գրագիտություն և համակարգչային գիտություն», 8-րդում՝ «Ֆրանսերեն», «Թվային գրագիտություն և համակարգչային գիտություն», «Ռուսաց լեզու», 10-րդ դասարանում՝ միանգամից 5 առարկայի դասագիրք` «Ֆրանսերեն», «Հայոց պատմություն», «Ռուսաց լեզու», «Քիմիա», «Կենսաբանություն»:

Factor TV-ն ԿԳՄՍ նախարարությունից հետաքրքրվեց, թե որոնք են ուսումնական այս տարում դասագրքերի բացակայության պատճառները: Կառույցից մեր գրավոր հարցմանն ի պատասխան՝ տեղեկացրին, որ 2024-2025 ուսումնական տարում «Հանրակրթության պետական չափորոշիչը» փուլային ներդրվում է նաև 3-րդ, 6-րդ, 8-րդ և 10-րդ դասարաններում։ Դրանով պայմանավորված՝ նախարարությունը հայտարարել է այդ դասարանների դասագրքերի ստեղծման դրամաշնորհային մրցույթներ, ինչպես նաև հայտարարել է մրցույթներ 2-րդ, 5-րդ և 7-րդ դասարաններում՝ պայմանավորված այդ դասարաններում որոշ դասագրքերի բացակայությամբ:

Ամփոփման արդյունքում դասագրքերի 80,3%-ը երաշխավորվել է գործածության, մինչդեռ 19,6%-ը չի ստեղծվել կամ չի հաղթահարել դասագրքի գնահատման համար սահմանված անցողիկ շեմը:

Մանրամասները՝ տեսանյութում։

Աննա Բաբաջանյան