04.08.2026 | 23:29
Չժաո Լեցզին շնորհավորել է Ռուբեն Ռուբինյանին ԱԺ նախագահ ընտրվելու կապակցությամբ
98 մլն դրամ՝ թեքահարթակների համար․ Երևանի քաղաքապետարանի հրատապ գնումը
Տնտեսություն
28.08.2024 | 10:29
Երևանի քաղաքապետարանը օգոստոսի 26-ին պայմանագիր է կնքել «Միլ Քոնսթրաքշն» ընկերության հետ՝ մայրաքաղաքում թեքահարթակների կառուցման աշխատանքներ իրականացնելու համար։ Պայմանագրի արժեքը 98 մլն 88 հազար դրամ է։
Երևանի քաղաքապետարանի հունիսի 3-ի գործակարգավարական խորհրդակցության ժամանակ նշվել էր, որ նախատեսված է 500 թեքահարթակ կառուցել Երևանի գրեթե բոլոր վարչական շրջաններում՝ բացառությամբ Նուբարաշենի և Նորք Մարաշի։
Թե քանի՞ թեքահարթակ է կառուցելու «Միլ Քոնսթրաքշն» ընկերությունն այս պայմանագրի շրջանակներում, հստակ հայտնի չէ։ Փաստաթղթում «ընդհանուր քանակը» նշված է «1», բայց, դատելով հատկացվող գումարի չափից, դա իրական թիվը չէ։
Ուշագրավ է, որ հունիսի 3-ի խորհրդակցության ժամանակ Շինարարության և բարեկարգման վարչության պետ Արմեն Հարությունյանը նշել էր, որ թեքահարթակների հասցեները հայտնի են։ Բայց քաղաքապետարանը շուրջ 2 ամիս անց՝ օգոստոսի 1-ին է հայտարարել հրատապ բաց մրցույթ։ Ի տարբերություն բաց մրցույթի, հրատապ բաց մրցույթի դեպքում մասնակիցներին շատ ավելի քիչ ժամանակ է տրվում հայտեր ներկայացնելու համար։ Տվյալ դեպքում քաղաքապետարանը հայտերի ներկայացման ժամկետը սահմանել էր մինչև օգոստոսի 12-ը, ժամը 10:00-ը։
Արդյունքում՝ մասնակիցը միայն մեկն է եղել՝ «Միլ Քոնսթրաքշն» ՍՊԸ-ն, որն էլ հաղթող է ճանաչվել։ Այս ընկերությունը հիմնադրվել է 2021 թ-ի հոկտեմբերին։ Միակ սեփականատերը Մխչյանում գրանցված Քաջիկ Մարտիրոսյանն է։
Եթե ընդունենք, որ ընկերությունը կառուցելու է 500 թեքահարթակ, ապա միավորի գինը ստացվում է մոտ 196 հազար դրամ։ Իսկ, օրինակ, 2023 թ-ին «Ռոուդկոնստրակտ» ընկերությունը Կենտրոն վարչական շրջանում կառուցել է 50 թեքահարթակ 8 մլն 999 հազար դրամով, այսինքն՝ միավորը մոտ 179 հազար դրամ՝ շուրջ 20 հազար դրամով ավելի էժան, քան «Միլ Քոնսթրաքշն»-ը։
Գայանե Խաչատրյան
