20.07.2026 | 14:36
Գրանցվել է 825 դեպք, որից 327-ը՝ արտակարգ․ Փրկարար ծառայությունն ամփոփում է անցած շաբաթը
ԱՄՆ Կոնգրեսում սեպտեմբերի 19-ին՝ Արցախի վրա Ադրբեջանի հարձակման տարելիցի օրը, լայնածավալ միջոցառում կանցկացվի
Քաղաքականություն
26.08.2024 | 14:07
ԱՄՆ Կոնգրեսում լայնածավալ միջոցառում կանցկացվի 2024 թվականի սեպտեմբերի 19-ին՝ Արցախի վրա Ադրբեջանի դաժան հարձակման տարելիցի օրը։
«Կոնգրեսի առաջնորդները, համայնքային ակտիվիստներն ու կոալիցիոն գործընկերները սեպտեմբերի 19-ին կհավաքվեն Կապիտոլիումի բլրի վրա՝ 2020-2023 թվականներին Արցախում ցեղասպանության համար Ադրբեջանին պատասխանատվության ենթարկելու ծրագրի շրջանակում՝ բնիկ հայերի անվտանգ վերադարձի կոչ անելով՝ միջազգային մանդատի ու միջազգային պաշտպանության ներքո»,- հայտնում է Ամերիկայի Հայ դատի հանձնախումբը (ANCA):
Նշվում է, որ «Հաշվետվական 2024» (Accountability 2024) խորագրով միջոցառումը համընկնում է 2023 թվականի սեպտեմբերի 19-20-ը Արցախի վրա Ադրբեջանի ռազմական հարձակման առաջին տարելիցի հետ, որը տասը ամիս տևած պաշարումից հետո ավարտվեց ցեղասպանական էթնիկ զտումներով և ավելի քան 120 հազար էթնիկ հայերի՝ իրենց պատպական հայրենիքից արտաքսմամբ։
«Մենք հավաքվում ենք Վաշինգտոնում ամբողջ Ամերիկայից՝ Ադրբեջանին պատասխանատվության ենթարկելու համար՝ օրենսդրորեն ռազմական օգնության արգելք և Ալիևի ցեղասպան ռեժիմի դեմ պատժամիջոցներ սահմանելով: Միացյալ Նահանգները կարող է և պետք է հետ շրջի այս ցեղասպանությունը՝ առաջնորդվելով ՄԱԿ-ի Անվտանգության խորհրդի բանաձևով, որը պարտավորեցնում է Արցախի բնիկ հայերի վերադարձ՝ միջազգային պաշտպանության ներքո»,- ասել է ANCA-ի գործադիր տնօրեն Արամ Համբարյանը։
Միջոցառմանը ելույթ կունենան ամերիկացի սենատորներ և փորձագետներ՝ ընդգծելով Ադրբեջանի դեմ պատժամիջոցների հարցում ԱՄՆ ղեկավարության քայլերի կարևորությունը, Արցախում ցեղասպանությունը վերապրածներին օգնության տրամադրումը և Արցախ հայերի անվտանգ վերադարձին աջակցելը։
