06.10.2026 | 21:03
24 ժամ ջուր չի լինի Դիլիջանի մի շարք հասցեներում
«Երևանի ՀԷԿ 1»-ում հրդեհի հետևանքների վերացման աշխատանքները կավարտվեն մոտակա օրերին․ ՀԷՑ-ը՝ հոսանքազրկումների պատճառի մասին
21.08.2024 | 14:47
Վերջին շրջանում գրեթե ամեն օր մայրաքաղաքի տարբեր հատվածներում, մասնավորապես, Կենտրոն վարչական շրջանում հոսանքի անջատումներ են։ Կենտրոնի բազմաթիվ բնակիչներ Factor.am-ին ահազանգում են, որ վերջին երեք օրերին մի քանի անգամ 1-2 ժամով հոսանքի անջատումներ են եղել։
Քաղաքացիների դժգոհությունների վերաբերյալ «Հայաստանի էլեկտրական ցանցեր» ընկերությունից Factor.am-ին պարզաբանեցին, որ էլեկտրաէներգիայի հաճախակի անջատումները պայմանավորված են «Երևանի ՀԷԿ 1»-ում տեղի ունեցած խոշոր հրդեհով։ ՀԷՑ-ի մամուլի ծառայությունից տեղեկացրեցին, որ «Երևանի ՀԷԿ 1»-ում հրդեհի հետևանքների վերացմանն ուղղված աշխատանքները շարունակվում են։ Ըստ նախնական կանխատեսման՝ դրանք ավարտին կհասցվեն մոտակա օրերի ընթացքում:
Ի դեպ, «Երևանի ՀԷԿ 1»-ը պատկանում է «Միջազգային էներգետիկ կորպորացիա» ընկերությանը։
ՀԷՑ-ից նաև հայտնեցին, որ ԵրՀԷԿ-ից սնվում է Երևանի Կենտրոն վարչական շրջանի մոտ 30 և Արաբկիր վարչական շրջանի 20 տոկոսը։
«Այսօրվա դրությամբ՝ այդ բեռը տեղաբաշխվել է ընկերության այլ ենթակայանների միջև, էլեկտրասնուցումն ապահովվում է պահուստային մալուխներով հավաքված, այլընտրանքային սխեմայի միջոցով։ Մինչդեռ սովորական պայմաններում պահուստային մալուխները ծառայում են հիմնական մալուխների փոխարինման համար: Այսինքն, եթե սովորական պայմաններում վթարի դեպքում մինչև հիմնական մալուխների նորոգումը դրանք փոխարինվում էին պահուստայինով, այժմ, չունենալով պահուստային սնուցում, բաժանորդները հոսանքազրկվում են, ինչպես նաև վթարների վերացման ժամկետները նախատեսվածից ավելի են տևում»,- նշեցին ընկերությունից։
Մանյա Պողոսյան
