30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Դավիթ Հարությունյանը դիմել է Բարձրագույն դատական խորհուրդ՝ ՍԴ որոշումից հետո իր գործը վերանայելու պահանջով
Հասարակություն
20.08.2024 | 16:42
Դատավոր Դավիթ Հարությունյանը, որի լիազորությունները մեկ տարի առաջ Բարձրագույն դատական խորհուրդը դադարեցրել է, դիմել է ԲԴԽ՝ իր գործը վերանայելու պահանջով։ Այս մասին Factor TV-ի հետ զրույցում նշեց ինքը՝ Հարությունյանը։
Հիշեցնենք, որ 2023 թվականի հուլիսի 3-ին Բարձրագույն դատական խորհուրդը որոշել էր դադարեցնել դատավորի լիազորությունները՝ լրատվամիջոցներին տված հարցազրույցի համար։ ԲԴԽ-ն նիստը դռնփակ էր անցկացրել՝ պնդելով, թե դա բխում է արդարադատության շահից։ Բացի այդ՝ նիստի ընթացքում Խորհուրդը որոշել էր Հարությունյանին հեռացնել նիստերի դահլիճից, և սա այն դեպքում, երբ դատավորը դեռևս չէր հասցրել իր կարգապահական գործի վերաբերյալ դիրքորոշում հայտնել՝ չնայած բազմիցս պնդել էր, որ դիրքորոշում ներկայացնելու է։ Այն պահին, երբ դատավորին հեռացրել են նիստերի դահլիճից, այնտեղ ներկա չեն եղել նաև դատավորի փաստաբանները։
ԲԴԽ որոշումից հետո Հարությունյանը դիմել էր Սահմանադրական դատարան, և Բարձր դատարանը մայիսի 21-ին որոշում է կայացրել, որ այս գործով հրապարակայնության սկզբունքին, դատական սանկցիա կիրառելուն վերաբերող նորմերը ԲԴԽ-ն Հարությունյանի նկատմամբ այլ մեկնաբանությամբ է կիրառել։
Դատական օրենսգրքի համաձայն՝ Բարձրագույն դատական խորհուրդն իրավունք ունի վերանայել դատավորին կարգապահական պատասխանատվության ենթարկելու հարցի մասին իր որոշումը նոր երևան եկած կամ նոր հանգամանքներով: Տվյալ դեպքում Սահմանադրական դատարանի որոշումը նոր հանգամանք է։
Օրենքով սահմանվում է նաև, որ Բարձրագույն դատական խորհրդի որոշումը վերանայելու դիմումը կարող է ներկայացվել դատավորի նկատմամբ կարգապահական վարույթ հարուցած մարմնի կամ այն դատավորի կողմից, որի նկատմամբ կարգապահական պատասխանատվության ենթարկելու մասին որոշում է կայացվել։
Տվյալ դեպքում Հարությունյանի նկատմամբ կարգապահական վարույթ հարուցած մարմինն Արդարադատության նախարարությունն է, որը ՍԴ-ի որոշումից հետո չի դիմել Բարձրագույն դատական խորհուրդ՝ վերանայման հարցով, այլ դիմումը ներկայացրել է Դավիթ Հարությունյանը։
Նշենք, որ Հարությունյանի լիազորությունները դադարեցնելու որոշումը կայացրել են դատավորներ Վիգեն Քոչարյանը։ Արթուր Աթաբեկյանը, Քրիստինե Մկոյանը, Հայկ Գրիգորյանը, Երանուհի Թումանյանցը, Կարեն Անդրեասյանը։ Այս պահին վերջին 5 անձինք շարունակում են ԲԴԽ անդամ լինել, իսկ Վիգեն Քոչարյանի լիազորությունների ժամկետն ավարտվել է։ Այժմ ԲԴԽ անդամ են նաև Էդգար Հովհաննիսյանը, Մերի Համբարձումյանը, Արմեն Դանիելյանը և Կարեն Թումանյանը։ Փաստացի միայն այս չորս անձինք են, որ չեն մասնակցել ԲԴԽ-ում Դավիթ Հարությունյանի գործի քննությանը, սակայն չորս անդամով Խորհուրդը որոշում կայացնել չի կարող։ Ստեղծված իրավիճակում ինչպես են վարվելու Դավիթ Հարությունյանի վերաբերյալ որոշումը կայացրած խորհրդի անդամները, դեռևս պարզ չէ։
Արաքս Մամուլյան
