15.07.2026 | 00:59
ԱԱ-2026․ Իսպանիան հաղթեց Ֆրանսիային և դուրս եկավ եզրափակիչ․ ՏԵՍԱՆՅՈՒԹ
Իշխանության համար պայքարին չեմ պատրաստվում մասնակցել․ Դավիթ Տոնոյան․ ՏԵՍԱՆՅՈՒԹ
Հասարակություն
20.08.2024 | 13:41
Ամենայն պատասխանատվությամբ հայտարարում եմ, որ այդ հրթիռները թե՛ գնման պահին, թե՛ դրանից հետո, թե՛ այսօր կիրառության համար պիտանի են։ Այս մասին դատարանի դիմաց լրագրողների հարցին ի պատասխան՝ ասաց «Անպիտան հրթիռներ» անունը ստացած գործով մեղադրյալ, պաշտպանության նախկին նախարար Դավիթ Տոնոյանը, որն օրեր առաջ է ազատ արձակվել կալանքից։
Նախկին նախարարն առաջարկեց մեղադրանքի վերաբերյալ մյուս հարցերն ուղղել իր պաշտպաններին:
Factor TV-ի հարցին՝ պատրաստվո՞ւմ է քաղաքական գործընթացների մասնակցել, մասնավորապես, միանալ Նիկոլ Փաշինյանի հրաժարականի պահանջով ընդդիմության ցույցերին, Դավիթ Տոնոյանն արձագանքեց. «Ես այդքան անլուրջ անձնավորության տպավորությո՞ւն եմ ստեղծել»։
Այնուհետև նա հստակեցրեց՝ խոսքը ոչ թե ցույցերին մասնակցել-չմասնակցելու մասին է, այլ ինքը դեռևս ցանկություն չունի քաղաքականությամբ զբաղվել:
Դիտարկմանը, որ քաղաքականությունը, այնուամենայնիվ, զբաղվում է նախկին նախարարով, որը ժամանակին հայտարարել է, թե իր նկատմամբ թավշյա քաղաքական հետապնդում է իրականացվում, Տոնոյանը պատասխանեց․ «Խոսքը վերաբերում է իշխանության համար պայքարին, թե չէ քաղաքականության մեջ ես միշտ եմ եղել՝ 30 տարի, բայց պաշտպանական, անվտանգային քաղաքականության մեջ, երբեք իշխանության համար չեմ պայքարել»։
Արաքս Մամուլյան
