Պաշտոնական նամակ չենք ստացել․ ՍԱՏՄ-ն՝ հայկական կոնյակի մասին ռուսական կողմի տարածած լուրերին ի պատասխան

Հայաստանը պաշտոնական նամակ չի ստացել ռուսական կողմի տարածած այն հայտարարության մասին, թե ՌԴ-ում վաճառվող հայկական կոնյակի գրեթե 90%-ը չի համապատասխանում պետության ստանդարտներին։ Այս մասին Factor.am-ին հայտնեցին ՀՀ սննդամթերքի անվտանգության տեսչական մարմնից։

Գերատեսչությունից նշեցին՝ տեղյակ չեն, թե, մասնավորապես, որ ապրանքանիշների մասին է խոսքը։

Ավելի վաղ «Անտիկոնտրաֆակտ» ասոցիացիայի ու Ռուսաստանի կոնյակ, սպիրտ և ալկոհոլային խմիչք արտադրողների միության համատեղ հետազոտության մեջ նշվել է, ռուսական խանութներում վաճառվող հայկական կոնյակի «գրեթե 90%-ն անվտանգ չէ, իսկ արտադրանքի գրեթե կեսը պարունակում է ոչ խաղողի սպիրտներ»։

Ըստ այդ հայտարարության՝ ուսումնասիրության համար ձեռք է բերվել ավելի քան 20 ապրանքանիշի կոնյակի 200 նմուշ հայաստանյան տասը խոշորագույն արտադրողներից։ Նմուշները ձեռք են բերվել ՌԴ մանրածախ ցանցերի խանութներից և ուսումնասիրության են հանձնվել Գարեջրագործության, ոչ ալկոհոլային և գինեգործական արդյունաբերության համառուսական գիտահետազոտական ինստիտուտի անկախ լաբորատորիա: Հետազոտության հեղինաները պնդում են, որ դրանցից 177-ում, այսինքն՝ 89%-ում՝ 10 նմուշից 9-ում, հայտնաբերվել են խախտումներ, իսկ գրեթե կեսում հայտնաբերվել են ոչ խաղողային ծագման սպիրտներ, և ընդամենը 23 նմուշ է լիովին համապատասխանում նորմերին և Ռուսաստանի Դաշնության օրենսդրությանը։

Հիշեցնենք, որ հուլիսի 17-ին էլ ՀՀ սննդամթերքի անվտանգության տեսչական մարմինը ՌԴ անասնաբուժական և բուսասանիտարական վերահսկողության դաշնային ծառայությունից («Ռոսսելխոզնադզոր») նամակ էր ստացել այն մասին, որ Հայաստանից Ռուսաստան արտահանվող պտուղ-բանջարեղենի՝ ապրիլ-հունիս ամիսների խմբաքանակներում արձանագրել է խախտումներ և որոշում կայացրել հուլիսի 15-ից ՌԴ տարածք հայաստանյան 16 ընկերությունների արտադրանքի մատակարարումը ժամանակավորապես սահմանափակելու մասին։ ՍԱՏՄ-ի փոխանցմամբ՝ միայն մեկ ընկերության նկատմամբ է արգելքը վերացվել։

Մանյա Պողոսյան