15.01.2025 | 23:34
Իսրայելն ու ՀԱՄԱՍ-ը հրադադարի համաձայնագիր են ստորագրել
ԵՄ անդամակցության հարցով ստորագրահավաքը կսկսվի սեպտեմբերին
Քաղաքականություն
19.08.2024 | 12:55
Սեպտեմբերին կսկսվի «Ժողովրդվարական ուժերի հարթակ»-ի նախաձեռնած Հայաստանի՝ ԵՄ-ին անդամակցելու հարցով ստորագրահավաքը, այս մասին այսօր հրավիրված ասուլիսին հայտնեց «Հանրապետություն» կուսակցության նախագահ Արամ Սարգսյանը։
«Դրա համար ձևավորվել է նախաձեռնող խումբ։ Օրենքը պահանջում է, որ նախաձեռնող խմբում լինի առնվազն 25 անդամ։ Մեզ մոտ, եթե չեմ սխալվում, անդամների թիվը 50-ի է հասնում։ Նախաձեռնող խումբն իր միջից ընտրում է լիազոր ներկայացուցիչ, ով խմբի անունից հանդես է գալու Կենտրոնական ընտրական հանձնաժողովում։ Ստորագրահավաքից հետո նաև հանդես է գալու ԱԺ պետաիրավական հանձնաժողովում՝ ներկայացնելով այն։ Եթե պետաիրավական հանձնաժողովը հաստատի, հետո նաև ԱԺ լիագումար նիստին պետք է ներկայացնի նախաձեռնությունը»,- մանրամասնեց Սարգսյանը։ «Հանրապետություն» կուսակցության նախագահը հայտնեց, որ նախաձեռնող խումբը լիազոր ներկայացուցիչ է նշանակել Արտակ Զեյնալյանին։
«Մեզ խոսակցություններ էին հասնում, որ իշխանությանը բացարձակ ձեռնտու չէ, որ 50 հազար ստորագրություն հավաքենք և իրենք էլ մերժեն։ Մենք նախաձեռնությունը մաքսիմալ անխոցելի ենք արել, որ չմերժի ԿԸՀ-ն»,- նշեց նա։
Եթե ՀՀ 50 հազար քաղաքացու ստորագրություն հավաքվի, ապա, համաձայն Սահմանադրության, հարցը կմտնի Ազգային ժողովի օրակարգ։ Չընդունվելու դեպքում անհրաժեշտ կլինի 300 հազար ստորագրություն նախագիծը հանրաքվեի դնելու համար։ Հիշեցնենք, որ հունիսի 21-ին ժողովրդավարական ուժերի նախաձեռնությամբ ԵՄ-ին Հայաստանի անդամակցելու հարցով հանրաքվե անցկացնելու հարցով նաև տեղի են ունեցել խորհրդարանական լսումներ։ Վարչապետ Նիկոլ Փաշինյանը «Ժողովրդավարության հայկական ֆորում»-ի ժամանակ ասել էր, որ Եվրամիությանն անդամակցելու հարցով հանրաքվե անցկացնելու անհրաժեշտություն չի տեսնում, քանի որ «գիտի ժողովրդի կարծիքը»։
