20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
Դոնալդ Թրամփը՝ հնարավոր միջուկային պատերազմի մասին
Քաղաքականություն
13.08.2024 | 11:45
Այս պահին մարդկության համար ամենալուրջ սպառնալիքը միջուկային պատերազմի հավանականությունն է, այլ ոչ թե գլոբալ տաքացումը։ Նման կարծիք է հայտնել նոյեմբերին կայանալիք նախագահական ընտրություններում Հանրապետական կուսակցությունը ներկայացնող ԱՄՆ նախկին նախագահ Դոնալդ Թրամփը՝ X հարթակում խոսելով դրա սեփականատեր և իր աջակից, միլիարդատեր Իլոն Մասկի հետ։ Շուրջ երկու ժամ տևած հարցազրույցը տեղի է ունեցել օգոստոսի 12-ին, փոխանցում է DW-ի ռուսական ծառայությունը։
Թրամփը ԱՄՆ գործող նախագահ Ջո Բայդենին անվանել է «հիմար մարդ»։
«Դուք պարզապես կունենաք ավելի շատ սեփականություն օվկիանոսի տեսարանով, այնպես չէ՞։ Ամենամեծ սպառնալիքն այլ տեղ է: Ամենամեծ սպառնալիքը միջուկային տաքացումն է, քանի որ մենք այժմ ունենք զգալի միջուկային հնարավորություններ ունեցող հինգ երկիր, և մենք չենք կարող թույլ տալ, որ Բայդենի նման հիմար մարդկանց հետ որևէ բան պատահի»,- այսպես է մեկնաբանել Դոնալդ Թրամփը գլոբալ կլիմայի փոփոխության խնդիրը։
Ուկրաինայի դեմ Ռուսաստանի շարունակվող պատերազմի և Մոսկվայի հայտարարությունների ֆոնին դիտորդները բազմիցս մտահոգություն են հայտնել միջուկային էսկալացիայի հնարավորության վերաբերյալ։ Նույնը վերաբերում է նաև այն պատերազմին, որն Իսրայելը մղում է Մերձավոր Արևելքում ՀԱՄԱՍ-ի դեմ։
Ի թիվս այլ բաների՝ Թրամփը, որը բազմիցս ընդգծել է իր բարեկամական հարաբերությունները Ռուսաստանի նախագահ Վլադիմիր Պուտինի և Չինաստանի նախագահ Սի Ցզինպինի հետ, ասել է, որ եթե ինքը վերադառնա Սպիտակ տուն, ապա ԱՄՆ-ում Իսրայելի օրինակով կստեղծվի սեփական արդյունավետ «Երկաթե գմբեթը»՝ հակաօդային պաշտպանության համակարգը:
Մասկի հետ զրույցում նա նաև ընդգծել է, որ պետք է լավ հարաբերություններ ունենալ Պուտինի, Սիի և Հյուսիսային Կորեայի ղեկավար Կիմ Չեմ Ընի հետ։
«Հուսով եմ, որ մենք նորից լավ հարաբերություններ կունենանք նրանց հետ: Գիտեք, նրանց հետ լավ հարաբերություններ հաստատելը լավ բան է, ոչ թե վատ»,- ասել է Թրամփը:
Մեկնաբանելով ուկրաինական պատերազմը՝ Թրամփը նշել է, որ «ոչ ոք իրենից ավելի անհանգստացած չէ դրա համար»։ Խոսելով Կիևին ԱՄՆ-ի և ԵՄ-ի կողմից տրամադրվող օգնության մասին՝ Թրամփը չի ասել, թե ընտրվելու դեպքում նվազեցնելու է Վաշինգտոնի այդ աջակցությունը, սակայն ակնարկել է, որ ճիշտ կհամարի ԵՄ-ից աջակցության ավելացումը։
