Քաղաքականություն
12.08.2024 | 17:17
Ուկրաինայի ԶՈՒ-ն շարունակում է Կուրսկի շրջանի վերահսկողության գոտին ընդլայնելու փորձերը, ուր ներխուժել էր օգոստոսի 6-ին՝ գրավելով տասնյակ բնակավայրեր և «Գազպրոմ»-ի առանցքային գազաբաշխիչ կայանը։ Financial Times-ը, վկայակոչելով ուկրաինացի զինվորականների հրապարակած լուսանկարներից և տեսանյութերից ստացված աշխարհագրական տվյալները, հայտնում է, որ կիրակի օրվա դրությամբ՝ նրանց առաջխաղացումը Ռուսաստանի տարածքի խորքում հասել է մոտ 30 կմ-ի։
Կուրսկի շրջանի Գլուշկովսկի շրջանում Ուկրաինայի զինված ուժերը սկսել են հարվածներ հասցնել Սեյմ գետի կամրջին, գրում է «Դվա մայորա» տելեգրամ ալիքը։ Այս հարձակումների նպատակն է խաթարել ռուսական ուժերի նյութատեխնիկական ապահովման ուղիները Տետկինո գյուղում, որը գտնվում է սահմանին մոտ, նշում է տելեգրամ ալիքը։
Թեև ռուսական Z-ալիքնները հաղորդում էին իրավիճակի կայունացման մասին Կուրսկի մարզում, որը դարձել է պատերազմի սկզբից ի վեր Ռուսաստանի տարածք ամենամեծ ներխուժման թատերաբեմ, ուկրաինական զինված ուժերին հաջողվել է առաջ շարժվել դեպի արևմուտք և հյուսիս-արևմուտք, ասվում է Պատերազմի ուսումնասիրման ամերիկյան ինստիտուտի (ISW) շաբաթավերջին հրապարակված ռազմական զեկույցում։
ՌԴ ՊՆ-ն հայտնել է Կուրսկի մարզում ևս մեկ՝ Բելովսկի շրջան ներխուժելու՝ Ուկրաինայի ԶՈւ փորձի մասին։ Այստեղից սկսել են տարհանել տեղի բնակիչներին, գրում է The Moscow Times-ը։ «Դվա մայորա» տելեգրամ ալիքը գրում է, որ ուկրաինական ուժերի տեխնիկան գտնվում է Գիրյի գյուղի մոտերքում։ «Ազատություն ռադիոկայանի» թղթակիցը ևս հաստատել է Ուկրաինայի ԶՈւ ներկայությունը Գիրյիում։
Ուկրաինայի ԶՈՒ-ն մտել է Մարտինովկայի հարավային հատված և այնտեղ դիրքավորվել, այնուհետև «օգտագործել այս հաջողությունը, որպեսզի սկսի կռվել հարևան Միխայլովկա գյուղի համար», – գրում է ռազմական թղթակից Յուրի Պոդոլյական։
«Չնայած Ռուսաստանի ԶՈԻ լրացուցիչ կազմավորումների տեղակայմանը, դեռևս չի հաջողվել ամբողջությամբ կայունացնել առաջնագիծը», – գրում է «Ռիբար» տելեգրամ ալիքը երկուշաբթի առավոտյան։
Ըստ ալիքի տեղեկությունների՝ իրավիճակը բարդանում է Սուջայի մոտերքում, մարտեր են ընթանում Կորենևոյի մատույցներում։
«Հակառակորդը տարածքը հագեցնում է զրահամեքենաներով, դիվերսիոն խմբերով, որոնք շփման գծի ողջ երկայնքով ներթափանցում են առաջնագծի գյուղեր»,- գրում է «Ռիբարը»։
Ուկրաինայի ԶՈւ հազարավոր մարտիկներ են մասնակցում Կուրսկի շրջանի վրա հարձակմանը, և նրանց հիմնական նպատակն է ձգել ռուսական բանակի դիրքերը և «ապակայունացնել իրավիճակը» Ռուսաստանի Դաշնությունում, AFP-ին ասել է Ուկրաինայի անվտանգության ուժերի բարձրաստիճան պաշտոնյան։
Ուկրաինայի զինված ուժերի գործողության ևս մեկ պատճառ կարող է լինել ռուսական զորքերը Խարկովի ճակատում թուլացնելը. Միացյալ Նահանգները դեռևս կարծում է, որ ներխուժման նպատակներից մեկը մատակարարման գծերի կրճատումն է, այդ թվում՝ Կուրսկի շրջանով, The Wall Street Journal-ին ասել է ամերիկացի պաշտոնյան։ Բացի այդ, տասնյակ գերեվարված ռուս զինվորները կարող են փոխանակվել ուկրաինացի ռազմագերիների հետ։
