12.12.2024 | 22:33
Հայաստանի մի շարք հասցեներում էլեկտրաէներգիայի անջատումներ կլինեն
Թեհրանը վերանայել է իր որոշումը․ ԱՄՆ-ը չի կանխատեսում, որ Իրանն առաջիկայում կհարձակվի Իսրայելի վրա․ Politico
Քաղաքականություն
08.08.2024 | 11:50
Իրանը, հնարավոր է, վերանայել է Իսրայելի վրա հարձակում սկսելու իր որոշումը։ Այս մասին հայտարարել են ԱՄՆ պաշտոնյաները, գրում է Politico-ն։
Երկու բարձրաստիճան պաշտոնյաներ ասել են, որ նախագահ Ջո Բայդենի վարչակազմը վերջին օրերին աշխատել է դիվանագիտական ուղիներով՝ ներգրավելով իր դաշնակիցներին Մերձավոր Արևելքում՝ համոզելու Թեհրանին վերանայել իր ռազմական հարձակումն Իսրայելի վրա: Նրանք զգուշացրել են Իրանին, որ զանգվածային հարվածը միայն կբորբոքի լարվածությունը և կարող է հանգեցնել երկու երկրների միջև ուղիղ առճակատման։
ԱՄՆ վարչակազմը նաև կոչ է արել Իրանին վերանայել ՀԱՄԱՍ-ի առաջնորդ Իսմայիլ Հանիեի սպանությանն արձագանքը, քանի որ նրա մահը հետևանք է Թեհրանում հյուրատանը տեղադրված հեռակառավարվող ռումբի, որը տեղադրվել էր գաղտնի գործողության արդյունքում և ոչ թե մեծ հարձակման մաս է։ Ըստ պաշտոնյաների՝ հիմա Թեհրանն ավելի ու ավելի է կիսում Վաշինգտոնի տեսակետները, թեև ի սկզբանե հերքում էր։
Ամերիկացի պաշտոնյաները տարբեր միջնորդների միջոցով Թեհրանին մեսիջներ են ուղարկել, որ եթե Հանիեի սպանության պայթյունը տեղի է ունեցել Իսրայելի գաղտնի գործողության արդյունքում և չի սպանել Իրանի ոչ մի քաղաքացու, ապա Իրանը պետք է վերագնահատի Իսրայելի վրա ռազմական հարձակման իր ծրագիրը: Պաշտոնյաներն ասել են, որ իրենք ակնկալում են Իրանի ինչ-որ արձագանք Հանիեի սպանությանը, սակայն Թեհրանը, ըստ երևույթին, վերանայել է իր դիրքորոշումը, և ԱՄՆ-ն առաջիկայում չի կանխատեսում հարձակում Իսրայելի վրա:
Լրագրողների հետ ճեպազրույցում հարցին՝ արդյո՞ք Միացյալ Նահանգները կարծում է, որ Իրանը փոխել է իր որոշումը, ԱՄՆ Ազգային անվտանգության խորհրդի խոսնակ Ջոն Քիրբին ասել է, որ ինքը չի խոսի հատուկ հետախուզական գնահատականների մասին, բայց շեշտել է՝ Բայդենի վարչակազմը «չի ցանկանում տեսնել սրացում»:
«Եթե լինի, մենք պատրաստ ենք պաշտպանել Իսրայելին և մեզ, ինչպես հարկն է»,- հավելել է նա։
