ԵՄ անդամակցության հարցով ստորագրահավաքը կսկսվի օգոստոսի կեսերին․ Ռուբեն Մեհրաբյան

Ներկա պահին ընթանում են Հայաստանի՝ ԵՄ անդամակցության հարցով ստորագրահավաք կազմակերպելու վերաբերյալ նախապատրաստական աշխատանքները, որոնք օրեր անց կավարտվեն, այս մասին Factor.am-ի հետ զրույցում ասաց «Ժողովրդավարական ուժերի հարթակ» նախաձեռնության անդամ, «Հանուն Հանրապետության» կուսակցության փոխնախագահ Ռուբեն Մեհրաբյանը։

Նրա խոսքով՝ նախապատրաստական աշխատանքներն ավարտելուց հետո կտրվի ստորագրահավաքի մեկնարկը, ինչի մասին հանրությանը կիրազեկեն։

Ըստ Մեհրաբյանի՝ ստորագրահավաքը կմեկնարկի օգոստոսի կեսին։ «Ժողովրդավարական ուժերի հարթակ» նախաձեռնության անդամը նաև հայտնեց, որ ստորագրահավաքի ժամանակ նախատեսում են այցելել մարզեր։

«Դա նաև յուրովի քարոզարշավ է լինելու, այցելելություններ կլինեն թե՛ մարզերում, թե՛ Երևանում՝ հավաքներ, հանդիպումներ»,- հավելեց նա։

Եթե ՀՀ 50 հազար քաղաքացու ստորագրություն հավաքվի, ապա, համաձայն ՀՀ Սահմանադրության, հարցը կմտնի Ազգային ժողովի օրակարգ։ Չընդունվելու դեպքում անհրաժեշտ կլինի 300 հազար ստորագրություն նախագիծը հանրաքվեի դնելու համար։

«Ստորագրահավաք անցկացնելու վերաբերյալ օրենքը նախատեսում է 45 օրացուցային օր, այդ ընթացքում 50 հազար ստորագրություն պետք է հավաքվի։ ԱԺ կուղարկենք այդ փաստաթղթերը։ Մեր համոզմամբ՝ այդ գաղափարի կրողները (Հայաստանի ԵՄ անդամակցության- խմբ․) մեր քաղաքացիների ջախջախիչ մեծամասնությունն են։ Ընդամենը, այսպես ասենք՝ տեխնիկական հարց է լինելու այդ ստորագրություններ հավաքելը։ Մեր իշխանություններն էլ այս հարցում համակարծիք են, կամ մենք ենք իրենց համակարծիք»,- նշեց Ռուբեն Մեհրաբյանը։

Ավելի վաղ «Ժողովրդավարական ուժերի հարթակ»-ը հայտարարել էր, որ մտադիր է ԵՄ-ին Հայաստանի անդամակցության հանրաքվեի հարցով ստորագրահավաք կազմակերպել։

Հիշեցնենք, որ հունիսի 21-ին ժողովրդավարական ուժերի նախաձեռնությամբ ԵՄ-ին Հայաստանի անդամակցելու հարցով հանրաքվե անցկացնելու հարցով նաև տեղի են ունեցել խորհրդարանական լսումներ։

Վարչապետ Նիկոլ Փաշինյանն էլ «Ժողովրդավարության հայկական ֆորում»-ի ժամանակ ասել էր, որ Եվրամիությանն անդամակցելու հարցով հանրաքվե անցկացնելու անհրաժեշտություն չի տեսնում, քանի որ «գիտի ժողովրդի կարծիքը»։

Մանյա Պողոսյան