Հայկական արբանյակները հետ կանչելու հարց երբևէ չի բարձրացվել․ ԲՏԱՆ

Որևէ պետություն հայկական արբանյակների վերաբերյալ բողոք չի ներկայացրել, այս մասին հայտնել է ՀՀ բարձր տեխնոլոգիական արդյունաբերության նախարարությունը` պատասխանելով Factor.am-ի հարցմանը։

Ավելի վաղ մամուլը գրել էր, թե «հայկական արբանյակները պատուհաս են դարձել» այլ երկրների նմանատիպ սարքավորումների համար։ Ըստ այդ տեղեկությունների` տարբեր երկրների կառավարություններից վարչապետ Նիկոլ Փաշինյանին նամակներ են հղել և հորդորել են իջեցնել արբանյակները, քանի որ ոչ պրոֆեսիոնալ և չհաշվարկված է եղել աշխատանքը, ինչպես նաև որակը և մեկնարկը:

Այս լուրերի վերաբերյալ ԲՏԱ-ին տեղեկացրել են, որ որևէ պետություն հայկական արբանյակների վերաբերյալ բողոք չի ներկայացրել։

«ՀՀ բարձր տեխնոլոգիաների նախարարությունը որևէ պետության կողմից գրավոր կամ բանավոր նամակ չի ստացել այն մասին, որ «Հայասաթ 1» և «Արմսաթ 1» արբանյակների կողմից շահագործվող ռադիոհաճախականությունները որևէ խանգարում են առաջացրել այլ պետությունների գործող արբանյակների և արբանյակային ցանցերի ռադիոհաճախականությունների համար»,- նշել են գերատեսչությունից։
ԲՏԱ-ից նաև վստահեցրել են, որ «Հայասաթ 1» և «Արմսաթ 1» արբանյակները տիեզերք արձակելուց առաջ անցել են համապատասխան ընթացակարգերով սահմանված բոլոր ստուգումներն ու թեստավորումները։ Նախարարությունից նաև պնդել են, որ հայկական արբանյակները հետ կանչելու հարց երբևէ չի բարձրացվել։

Հիշեցնենք, որ «Urdaneta» արբանյակը Հայաստանի համար պատրաստել է իսպանական «Satlantis» ընկերությունը։ Գործարկումը տեղի է ունեցել 2022-ի մայիսի վերջին, որից հետո այն վերանվանվել է «Արմսաթ 1»։ Իսկ հայկական արտադրության առաջին արբանյակը՝ «Հայասաթ 1»-ը, գործարկվել է 2023-ի դեկտեմբերին։ Այն ստեղծվել է «Բազումքի» և «Գիտական նորարարության և կրթության կենտրոն»-ի՝ «Center for Scientific Innovation and Education»-ի հայ գիտնականների կողմից։

Մանյա Պողոսյան