Նոր աղմուկ նոր գրքի շուրջ. դասագրքի հեղինակը չի ընդունում մրցույթի արդյունքը․ ՏԵՍԱՆՅՈՒԹ

Կրթության փորձագետ Սերոբ Խաչատրյանը պնդում է՝ Հասարակագիտության 8-րդ դասարանի դասագրքի մրցույթն արդար չի անցկացվել։ Խաչատրյանի խոսքով՝ ԿԳՄՍ նախարարությունից հայտնել են, որ իր և ԵՊՀ իրավագիտության ֆակուլտետի դասախոս, փաստաբան Արսեն Թավադյանի հեղինակած դասագիրքն անցումային շեմը չի հաղթահարել, այնինչ ստանալով դասագրքի գնահատման տվյալները՝ հեղինակները պարզել են, որ ոչ միայն հաղթահարել են անցողիկ շեմը, այլև բարձր գնահատականներ ստացել։

Խաչատրյանն ասում է՝ մասնագիտական հանձնաժողովի 3 անդամներ իրարից անկախ տվել են նույն եզրակացությունը, որ 3 դասագրքերից հենց իրենցն է լավագույնը։ Ըստ Խաչատրյանի՝ փորձագետներին գնահատման սանդղակ չի տրվել, և միայն փորձագիտական արդյունքներից հետո է նախարարությունը հայտնել, որ գնահատումը սխալ սանդղակով է իրականացվել։

ԿԳՄՍ նախարարությունից պնդում են՝ մինչև հանձնաժողովի ձևավորումը ընտրված 5 գիտական կառույցներին ներկայացվել է սանդղակը և դրա գնահատման կարգը, որից 2-ը փորձագիտությունն այդ սանդղակով չեն իրականացրել։ Այս դեպքում հանձնաժողովը որոշել է այդ երկու կառույցների կողմից իրականացված փորձաքննություններն անվավեր ճանաչել, քանի որ դրանք չեն համապատասխանել գնահատման որևէ չափանիշի։

Փիլիսոփա Արշակ Բալայանը, որը Հասարակագիտության 8-րդ դասարանի դասագրքի գնահատման հանձնաժողովի փորձագետներից է, հրապարակային կարծիք էր հայտնել հաղթած երկու դասագրքերից մեկի մասին։ Փորձագետը 10 օրինակ է մատնանշել, որտեղ պնդում է՝ առկա են ինչպես տեխնիկական, այնպես էլ բովանդակային մի շարք սխալներ։

ԿԳՄՍՆ Հանրակրթության վարչության պետ Թամարա Սարգսյանը, պատասխանելով այս դիտարկումներին, ընդգծում է՝ եթե դասագիրքը գիտական և չափորոշչային համապատասխանության տեսանկյունից դրական է գնահատվում, ապա մինչև տպագրման փուլն ուղարկվում է լրամշակման և շտկվում են առկա մյուս խնդիրները։

Դասագրքի հեղինակները դեռ հուլիսի 3-ին բողոքարկել էին մրցույթի արդյունքները, սակայն, Սերոբ Խաչատրյանի խոսքով, նախարարությունը պատշաճ չի արձագանքել մրցույթի արդյունքների բողոքարկմանը։

Հանրակրթության վարչության պետը նշում է՝ 3 դասագրքերն էլ գրեթե հավասար միավորներ էին ստացել, բայց այս պարագայում մեկ միավորն էլ կարող էր վճռորոշ լինել։ Կրթության փորձագետն էլ ասում է՝ ամենածավալուն և օգտակար դասագիրքը հենց իրենցն է եղել, և պատրաստ են դա ապացուցել։

Մանրամասները՝ տեսանյութում։

Անի Թամրազյան