06.10.2026 | 21:03
24 ժամ ջուր չի լինի Դիլիջանի մի շարք հասցեներում
Վերին Լարսում բեռնատարների որոշակի կուտակում կա․ ՌԴ-ում ՀՀ դեսպանության մաքսային կցորդ
Տնտեսություն
29.07.2024 | 12:45
Վերին Լարսի անցակետում Հայաստանից Ռուսաստան ուղղությամբ կուտակումներ չկան, իսկ հակառակ ուղղությամբ 550 բեռնատար սպասում է իր հերթին, այս մասին Factor.am-ին հայտնեց ՌԴ-ում ՀՀ դեսպանության մաքսային կցորդ Վահան Հակոբյանը։
Անդրադառնալով Հյուսիսային Օսիայի ճանապարհային երթևեկության կազմակերպման կենտրոնի տարածած տեղեկությանը, թե Վերին Լարսի անցակետի մոտ ավելի քան 2700 բեռնատար է կուտակվել, Վահան Հակոբյանը պարզաբանեց, որ այդ թիվը Վրաստան մուտքի համար առցանց գրանցված բեռնատարների քանակն է։
«Շատ բեռնատարներ կարող են հերթագրվել, բայց ավելի ուշ ճանապարհ դուրս գալ, ինչը նշանակում է, որ թիվը ճշգրիտ չէ և չի արտացոլում այսօրվա պատկերը։ Ունենում ենք նաև դեպքեր, երբ Հայաստանից եկող բեռնատարը, որը պետք է ՌԴ-ում բեռնաթափվի, նոր ապրանքներ վերցնի և հետ գա, Վրաստանից Ռուսաստան չմտած այդ հերթում գրանցվում է, այսինքն՝ այդ հերթի իրական թիվը մոտ կիսով չափ պակաս է։ Եթե հաղորդում են, օրինակ, 3000 մեքենայի կուտակման մասին, հազիվ իրական կուտակման թիվը 1500 լինի։ Ուղղակի, նախապես գրանցվում են, որ իրենց հերթը հասնի և չգան սպասեն»,- նշեց ՌԴ-ում ՀՀ դեսպանության մաքսային կցորդը։
Հիշեցնենք, որ հուլիսի 26-ին Վերին Լարսի անցակետով երթևեկությունը մի քանի ժամով արգելվել էր սելավահոսքերի պատճառով։
Մանյա Պողոսյան
