Մանկապարտեզի նախկին տնօրենը պնդում է՝ համայնքապետարանը պահանջել է իր համար ցանկալի անձին աշխատանքի ընդունել, աշխատակազմից հերքում են

Սպիտակ համայնքի Շիրակամուտ բնակավայրի «Արևիկ» մանկապարտեզում քանի օր է՝ լարված իրավիճակ է։ Մանկապարտեզի նախկին տնօրեն Մարինե Գալստյանը Factor.am-ին ահազանգել է՝ պնդելով, որ իրեն ապօրինի ազատել են աշխատանքից: Գալստյանը հայտարարում է, որ համայնքապետարանի աշխատակազմն իր հետ լարվել է այն բանից հետո, երբ ինքը հրաժարվել է աշխատանքի ընդունել աշխատակազմի ղեկավարի կողմից առաջարկված անձին։

«Ես իրենց ուզած մարդուն չեմ ընդունել աշխատանքի, որովհետև չէր համապատասխանում չափորոշիչներին: Եթե ես դայակ պետք է ընդունեի, իմ լիազորության ներքո էր, չէ՞, իսկ իրենք ինձ պարտադրում էին, որ մենք հաստիք ենք իջացրել, դու ո՞վ ես, քեզնից ինչ ես ներկայացնում»,- ասում է Գալստյանը:

Սպիտակի համայնքապետարանի աշխատակազմի քարտուղար Ազգանուշ Ֆրանգյանը Factor.am-ի հետ զրույցում պնդեց՝ տնօրենից չի պահանջել որևիցե մեկին աշխատանքի ընդունել` հավելելով՝ մանկապարտեզի նախկին տնօրենի ազատման հիմքը ղեկավարման իրավունքի հավաստագիր չունենալն է եղել:

«Նոր կարգով եթե մինչև 2024 թվականի հունիսի մեկի դրությամբ մանկապարտեզների տնօրենները ղեկավարման իրավունքի հավաստագիր չեն ներկայացնում, պետք է լուծվի նրանց հետ կնքված աշխատանքային պայմանագիրը: Համայնքի բոլոր մանկապարտեզների տնօրենները մինչև մայիսի 29-ը ներառյալ հանձնել են քննությունները և ներկայացրել հավաստագրերը: Մարինե Գալստյանը հունիսի 1-ի դրությամբ չի ուեցել ղեկավարման իրավունքի հավաստագիր, ինչը նույն դրույթի համաձայն աշխատանքային պայմանագիրը լուծելու հիմք է հանդիսացել»,- նշում է Սպիտակի համայնքապետարանի աշխատակազմի քարտուղարը:

Արևիկ մանկապարտեզի նախկին տնօրենն ընդգծում է՝ հավաստագիր ստանալու համար հուլիսին քննությանը մասնակցել է, սակայն չի հաղթահարել անցողիկ շեմը, իր խոսքով, «համայնքապետարանի կողմից հոգեբանական ճնշումների պատճառով»։ Ասում է` հնարավորություն ունի օգոստոսին ևս մեկ անգամ քննություն հանձնելու: Գալստյանի խոսքով՝ ԿԳՄՍ նախարարությունից ասել են, որ մինչև հավաստագիր ստանալը կարող է դառնալ տնօրենի ժամանակավոր պաշտոնակատար, սակայն համայնքապետարանը թույլ չի տալիս նույնիսկ մանկապարտեզ մտնել:

Սպիտակի համայնքապետարանի աշխատակազմի քարտուղար Ազգանուշ Ֆրանգյանն էլ նշում է՝ Գալստյանին պատշաճ ծանուցվել է իր ազատման հիմքերի մասին: Նրա խոսքով՝ տնօրենի թափուր հաստիքի համար առաջիկա օրերին մրցույթ կհայտարարվի։ Սպիտակի համայնքապետարանից ասում են, եթե նախկին տնօրենը մասնակցի և հաղթի մրցույթին, նորից կնշանակվի իր պաշտոնին:

Անի Թամրազյան