ԶՊՄԿ-ն կրկին առաջատարն է, «Գազպրոմ»-ը կրճատել է հարկերը․ որոնք են Հայաստանի խոշոր հարկատուները

Զանգեզուրի պղնձամոլիբդենային կոմբինատը կրկին գլխավորում է ՀՀ խոշոր հարկատուների ցանկը՝ շուրջ 64 մլրդ 50 մլն դրամ վճարած հարկերով։ Սրանք 2024 թվականի առաջին կիսամյակի տվյալներն են։ 

Ի տարբերություն նախորդ տարվա նույն ժամանակահատվածի՝ ԶՊՄԿ-ն գրեթե կրկնապատկել է վճարած հարկերը։ Նախորդ տարվա առաջին 6 ամիսներին ընկերությունը վճարել էր շուրջ 34,7 մլրդ դրամ։ 

2-րդ տեղում «Մոբայլ Սենթր Արտ» ընկերությունն է, որը զբաղվում է բջջային հեռախոսների վաճառքով։ Ընկերությունը տարվա առաջին 3 ամիսներին առաջին անգամ հայտնվել էր ՀՀ 1000 խոշոր հարկատուների 1-ին տեղում, սակայն կիսամյակային տվյալներով զիջել է իր դիրքը 1 հորիզոնականով։ «Մոբայլ Սենթր Արտ» ընկերությունը 2024 թվականի հունվար-հունիս ամիսներին ՀՀ բյուջե է վճարել շուրջ 32,3 մլրդ դրամ՝ նախորդ տարվա 15,8 մլրդ դրամի փոխարեն։ Նշենք, որ նախորդ տարվա առաջին կիսամյակում ընկերությունը 1000 խոշոր հարկատուների ցանկում 6-րդն էր, ու թեև այս տարվա առաջին եռամյսակի համեմատ մի փոքր զիջել է դիրքերը, այնուամենայնիվ, կրկնապատկել է վճարած հարկերն ու մնացել առաջին եռյակում։ 

3-րդ տեղում «Գազպրոմ Արմենիա» ընկերությունն է՝ վճարած 27,5 մլրդ դրամ հարկերով։ Նախորդ տարվա նույն ժամանակահատվածի համեմատ ընկերությունը զիջել է իր դիրքերը 1 հորիզոնականով ու փոքր ինչ նվազեցրել հարկերը։ Նախորդ տարվա առաջին 6 ամսում ընկերությունը վճարել էր 30,6 մլրդ դրամ։ 

4-րդ տեղում «Գրանդ տոբակո» ընկերությունն է՝ 23,5 մլրդ դրամ վճարած հարկերով։ Այս ընկերությունը ևս նախորդ տարվա նույն ժամանակահատվածի համեմատ զիջել է իր դիրքը 1 հորիզոնականով, սակայն վճարած հարկերն ավելացել են։ Նախորդ տարվա հունվար-հունիս ժամանակահատվածում «Գրանդ տոբակո»-ն պետությանը 20,2 մլրդ դրամ էր վճարել։ 

5-րդ տեղում «Փրիթի Ուեյ» ընկերությունն է, որը ներկայացնում է «Վեստա» խանութների ցանցը։ Ընկերությունը նախորդ տարվա առաջին կիսամյակում 7-րդ հորիզոնականում էր՝ վճարած 15,7 մլրդ դրամ հարկերով։ Այս տարի եզրափակում է առաջին հնգյակը 15,7 մլրդ դրամ հարկերով։ 

Առաջին տասնյակում են նաև «Ամերիաբանկ»-ը, «Վիվա Արմենիա»-ն, «Սի Փի Էս էներջի գրուպ»-ը, «Սոֆթ Քոնսթրաքթ»-ը և «Սիթի»-ն՝ըստ հերթականության։ 

«Ամերիաբանկ»-ը նախորդ տարվա առաջին կիսամյակում 4-րդն էր, այս տարի՝ 6-րդը՝ վճարած 17,5 մլրդ դրամ հարկերով։  

«Վիվա Արմենիա»-ն (նախկինում ՄՏՍ Հայաստան) նախորդ տարվա առաջին կիսամյակում 13-րդն էր՝ վճարած 8,1 մլրդ դրամ հարկերով, այս տարվա առաջին կիսամյակում վճարել է 10,7 մլրդ դրամ։  

«Սի Փի Էս էներջի գրուպ»-ը նախորդ տարի 8-րդ հորիզոնականում էր՝ 11,3 մլրդ դրամ հարկերով, այս տարի թեև կրճատել է վճարած հարկերը (9.7 մլրդ դրամ), բայց մնացել է 8-րդ տեղում։ 

«Սոֆթ Քոնսթրաքթ»-ը նախորդ տարի 21-րդ տեղում էր՝ վճարած 5,6 մլրդ դրամ հարկերով, այս տարի վճարել է 9,3 մլրդ դրամ և հայտնվել առաջին տասնյակում։ 

Տասնյակը եզրափակում է «Սիթի»-ն՝ վճարած 9,3 մլրդ դրամ հարկերով։ Նախորդ տարի ընկերությունը 15-րդ տեղում էր՝ վճարած 7,3 մլրդ դրամ հարկերով։ 

Նախորդ տարվա առաջին կիսամյակի համեմատ առաջին տասնյակից դուրս են մնացել «Ինթերնեյշնլ Մասիս տաբակ»-ը և «Ջեյ Թի Այ Արմենիա»-ն։ 

«Ինթերնեյշնլ Մասիս տաբակ»-ն այս տարի 11-րդն է՝ վճարած 8.8 մլրդ դրամ հարկերով։ Նախորդ տարի վճարել էր 11,3 մլրդ դրամ, այսինքն՝ վճարած հարկերը կրճատվել են։  

«Ջեյ Թի Այ Արմենիա»-ն հայտնվել է 19-րդ հորիզոնականում վճարած 6,2 մլրդ դրամ հարկով, նախորդ տարի վճարել էր 9,2 մլրդ դրամ, այսինքն՝ այս ընկերությունը ևս կրճատել է հարկերը։ 

Անժելա Պողոսյան