27.12.2025 | 19:00
32 անշարժ գույք և 312 մլն դրամ եկամուտ․ ինչ է հայտարարագրել Հայկ Մարությանը
Ձեռնպահ մնալ Հարավային Կովկասում պատերազմի նոր օջախ ստեղծելու մտադրությունից․ Բաքուն սպառնում է ՀՀ-ին և նրա «հովանավորներին»
25.07.2024 | 18:09
Ադրբեջանի ՊՆ-ն անհանգստացած է տարբեր երկրների հետ Հայաստանի ռազմական համագործակցությունից ու Երևանին մեղադրում է «սադրանքների» իրականացման մեջ։ Բաքվին մտագոհում են Հայաստանի ու ԱՄՆ-ի անցկացրած համատեղ զորավարժությունները, ԵՄ խաղաղության հիմնադրամից ՀՀ ԶՈՒ-ին 10 մլն եվրոյի ռազմական աջակցության հատկացումը, ինչպես նաև Երևանի ու Փարիզի ռազմական համագործակցությունը։
«Ամերիկայի Միացյալ Նահանգների կողմից Հայաստանում անցկացվող զորավարժությունները, Ֆրանսիայի կողմից Հայաստանին մահաբեր զենքի տրամադրումը և Եվրոպական միության կողմից Հայաստանին խաղաղության եվրոպական հիմնադրամի միջոցներով նախնական փուլում ռազմական օգնության տրամադրումը 10 մլն եվրոյի չափով, ոգեշնչում է «օկուպացիոն» Հայաստանին նմանատիպ սադրանքներ իրականացնելու և վկայում Ադրբեջանի դեմ հերթական պատերազմի պատրաստվելու մասին»,- ասվում է Ադրբեջանի ՊՆ հայտարարության մեջ։
Բաքուն, որը շարունակում է ակտիվորեն զինվել և միաժամանակ օկուպացիայի տակ պահել ՀՀ սուվերեն տարածքները, սպառնում է ՀՀ-ին։
«Պաշտպանության նախարարությունը ևս մեկ անգամ զգուշացնում է Հայաստանին և նրա հովանավորներին, որ պետք է ձեռնպահ մնան Հարավային Կովկասում պատերազմի նոր օջախ ստեղծելու մտադրությունից։ Եթե մեր երկրի դեմ նման սադրիչ գործողությունները չդադարեցվեն, ապա Ադրբեջանի զինված ուժերի զինանոցում առկա բոլոր միջոցներով ինքնապաշտպանության նպատակով կձեռնարկվեն համապատասխան պատասխան միջոցները»,- նշվում է հայտարարության մեջ։
Այսօր ավելի վաղ Ադրբեջանի ՊՆ-ն հայտնել էր, թե իբր հուլիսի 25-ին՝ ժամը 10:55-ին, Հայաստանի զինված ուժերի ԱԹՍ-ն ադրբեջանական Թովուզի շրջանի ուղղությամբ ադրբեջանական բանակի դիրքերի վրայով փորձել է հետախուզական թռիչք իրականացնել։
Հավելենք, որ օրերս պաշտոնական Երևանը Բաքվին կրկին առաջարկել էր հրադադարի ռեժիմի խախտման դեպքերի հետաքննության Հայաստան-Ադրբեջան համատեղ մեխանիզմ ստեղծել։ Այս առաջարկին Բաքուն որևէ կերպ չի արձագանքել։
Էմմա Չոբանյան
