24.01.2026 | 20:33
«Ինտերը» հայերեն գրառում է արել Հենրիխ Մխիթարյանի գոլի առթիվ․ ՏԵՍԱՆՅՈՒԹ
Միրզոյան- Բայրամով-Լավրով հանդիպումից 1 տարի անց․ Ադրբեջանը պատրաստ է ռուսական հարթակում նոր հանդիպման, Երևանը չի անդրադարձել Զախարովայի հայտարարությանը
Քաղաքականություն
25.07.2024 | 14:05
Պաշտոնական Մոսկվան դարձյալ հայտարարում է, որ պատրաստ է աջակցել Հայաստանին և Ադրբեջանին խաղաղության պայմանագիր կնքելու հարցում։
ՌԴ ԱԳՆ պաշտոնական ներկայացուցիչ Մարիա Զախարովան երեկվա ճեպազրույցում ասել էր, թե «Ռուսաստանը պարտավորվել է, և դա գրված է Մոսկվայի ստորագրած փաստաթղթում, ամեն կերպ աջակցել Հայաստանի և Ադրբեջանի միջև խաղաղության հասնելուն»։ Զախարովան նշել էր, որ պատրաստ են այսուհետ ևս իրենց հարթակը տրամադրել կողմերին՝ իրենց նախընտրելի երկկողմ ձևաչափով բանակցությունների համար։
Մոսկվայի հայտարարությանը շտապել են արձագանքել Ադրբեջանից։ Այդ երկրի արտաքին գործերի նախարարության մամուլի քարտուղար Այխան Հաջիզադեն երեկ հայտարարել է, որ Ադրբեջանը միշտ պատրաստ է եղել Հայաստանի հետ բանակցությունների Ռուսաստանում և այլ հարթակներում։ Պաշտոնական Երևանը դեռ չի անդրադարձել Մոսկվայից հնչող առաջարկին:
Հիշեցնենք, որ վերջին անգամ ռուսական հարթակում արտագործնախարարների մակարդակով բանակցություններ մեկ տարի առաջ են եղել։ Անցած տարի հենց այս օրը՝ հուլիսի 25-ին, Մոսկվայում տեղի է ունեցել Միրզոյան- Բայրամով-Լավրով հանդիպումը։ Այդ օրը եռակողմ ձևաչափով բանակցություններից բացի Լավրովը նաև առանձին հանդիպումներ է ունեցել Միրզոյանի և Բայրամովի հետ։
Չնայած Մոսկվան պարբերաբար հարթակ տրամադրելու առաջարկը կրկնում է, բայց ռուսական ֆորմատով բանակցություններ չկան։
Իսկ այս տարի հուլիսին Վաշինգտոնում ՆԱՏՕ-ի կազմավորման 75-ամյակին նվիրված գագաթաժողովի շրջանակներում ԱՄՆ պետքարտուղար Էնթոնի Բլինքենի նախաձեռնությամբ էր կայացել Միրզոյան- Բայրամով- Բլինքեն եռակողմ հանդիպումը։
Մանյա Պողոսյան
