28.05.2026 | 23:35
Որտե՞ղ է կռվել Արթուր Օսիպյանը․ Նիկոլ Փաշինյանին արձագանքում են Օսիպյանի մարտական ընկերները
Լեհաստանը սպառնացել է արգելափակել չինական ապրանքների մատակարարումը Եվրոպա
Քաղաքականություն
24.07.2024 | 23:02
Լեհաստանի իշխանությունները սպառնացել են փակել դեպի Եվրամիություն չինական ապրանքների արտահանման առանցքային երկաթուղային ճանապարհը՝ որպես արևելյան սահմանին միգրացիոն ճգնաժամի կարգավորման ռազմավարության մաս, գրում է Bloomberg-ը։
Նախագահ Անջեյ Դուդան հունիսի վերջին Պեկին կատարած իր պետական այցն օգտագործել է միգրացիայի և բելառուսական սահմանին բեռների տարանցման խնդիրը միմյանց կապելու համար, գործակալությանը հայտնել են բանակցություններին ծանոթ մի քանի աղբյուրներ: Այդ ժամանակից ի վեր բելառուսա-լեհական սահմանի ապօրինի հատումների թիվը զգալիորեն նվազել է։
Գործակալությունը պարզաբանում է, որ Բելառուսի նախագահ Ալեքսանդր Լուկաշենկոն փորձել է լարված իրավիճակ ստեղծել իր երկրի և Լեհաստանի սահմանին։
Իրավիճակը սրվեց մայիսին, երբ միգրանտի կողմից սպանվեց լեհ զինվոր, որից հետո կառավարությունը պարտավորվեց մոտ 2,5 միլիարդ դոլար ծախսել սահմանն ամրացնելու համար։
Ռուսական ներխուժումն Ուկրաինա կտրել է երկաթուղային առևտրային ուղիները, և Բելառուսը դարձել է միակ ճանապարհը դեպի ԵՄ չինական ապրանքների համար, իսկ երթևեկությունը 2024 թվականի առաջին եռամսյակում աճել է 89%-ով: Լուկաշենկոն գոհ է չինական տարանցումների աճից՝ փորձելով փոխհատուցել Մոսկվայից համեմատաբար էժան էներգառեսուրսների և վարկերի համար Մինսկի գրեթե լիակատար կախվածությունը։
Լեհաստանի կողմից բեռների տարանցման օգտագործումը Չինաստանի հետ բանակցություններում «կարող է գործոն լինել» Դուդայի այցից հետո սահմանային անցումների քանակի կրճատման համար, Bloomberg-ին ասել է հանրապետության արտաքին գործերի նախարար Ռադոսլավ Սիկորսկին: «Մենք դեռ շատ զայրացած ենք սահմանին մեր զինվորի սպանության համար»,- նշել է նա։
Լեհաստանի սահմանը խախտելու փորձերը սկսել են ակտիվանալ հունիսին կայանալիք Եվրախորհրդարանի ընտրություններից առաջ։ Վարչապետ Դոնալդ Տուսկը հայտարարել է, որ Բելառուսն ու Ռուսաստանը միգրացիան վերածել են զենքի, և Եմենից, Սոմալիից, Աֆղանստանից, Սիրիայից և Իրանից միգրանտներ են շտապում հանրապետություն։
Դուդայի Պեկին այցելությունից հետո սահմանն ապօրինի հատելու փորձերը նվազել են 70%-ով, հայտնել է ներքին գործերի նախարար Թոմաշ Սեմոնյակը։
Արևելյան հետազոտությունների կենտրոնից Կոնրադ Պոպլավսկին կարծում է, որ դեպի ԵՄ չինական արտահանման միայն մի փոքր մասն է գնում Բելառուսով, իսկ Կարմիր ծովով նավագնացության ճգնաժամը և դրա հետևանքները ծովային առևտրի վրա նշանակում են, որ եվրասիական երկաթուղային կապերը վերածնունդ են ապրում:
