12.01.2026 | 23:30
Գերմանիան և Հնդկաստանն ընդլայնում են ռազմական համագործակցությունը
Պետքարտուղարության քաղաքացիական խորհրդատուն աշխատանքի կանցնի այս տարի․ ՀՀ-ում ԱՄՆ դեսպանատուն
Քաղաքականություն
22.07.2024 | 16:16
ԱՄՆ պետքարտուղարության քաղաքացիական խորհրդատուի ընտրությունը կատարված է, և այս տարի ավելի ուշ նա աշխատանքի կանցնի, այս մասին Factor.am-ի գրավոր հարցմանն ի պատասխան տեղեկացրել են ՀՀ-ում ԱՄՆ դեսպանատնից՝ պատասխանելով հարցին՝ ե՞րբ է ԱՄՆ ներկայացուցիչը աշխատանքը սկսելու Հայաստանի պաշտպանության նախարարությունում։
Դեսպանատնից նաև հայտնել են, որ խորհրդատուն աշխատելու է Հայաստանում՝ կանոնավոր աշխատանքային շփումներ ունենալով դեսպանության և պաշտպանության նախարարության հետ։
Մեր գրավոր հարցման պատասխանում նշվում է, որ խորհրդատվական աջակցության միջոցով Միացյալ Նահանգները մտադիր է օգնել Հայաստանին անվտանգության ոլորտի կառավարման բարելավման հարցում, որն էլ իր հերթին կնպաստի հայ-ամերիկյան հարաբերությունների ամրապնդմանը։
«ԱՄՆ պետքարտուղարության Գլոբալ պաշտպանական բարեփոխումների ծրագիրն աշխարհով մեկ աջակցում է գործընկեր պետություններին առավել դիմակայուն, արդյունավետ ու հաշվետու անվտանգային հաստատությունների ձևավորման հարցում՝ ապահովելով ռազմավարական մակարդակի խորհրդատվական աջակցություն։ Քաղաքացիական խորհրդատուն չի ֆինանսավորվում ԱՄՆ բանակի կամ Պաշտպանության դեպարտամենտի կողմից․ ֆինանսավորումն ապահովվում է Պետքարտուղարության կողմից և խորհրդատուն աջակցելու է Հայաստանի պաշտպանական հաստատությունների ամրապնդման հարցում»,- մեկնաբանել են դեսպանատնից։
Հիշեցնենք, որ քաղաքացիական անվտանգության, ժողովրդավարության և մարդու իրավունքների հարցերով ԱՄՆ պետքարտուղարի տեղակալ Ըզրա Զեյան «Հետք»-ի հետ զրույցում հաստատել էր այն տեղեկությունը, թե որոշում կա, որ ամերիկյան բանակի ներկայացուցիչ կաշխատի Հայաստանի պաշտպանության նախարարությունում։
Մանյա Պողոսյան
