19.02.2026 | 20:38
Կոնֆերենցիաների լիգա․ «Նոայի» մեկնարկային կազմը «ԱԶ Ալկմարի» դեմ խաղում
Հայաստանից 500 բեռնատար մեկնել է Վերին Լարսի ուղղությամբ․ ՌԴ-ում ՀՀ դեսպանության մաքսային կցորդ
Հասարակություն
15.07.2024 | 13:25
Վերին Լարսի ճանապարհին հերթեր չկան, իսկ անցակետն աշխատում է բնականոն հունով, այս մասին Factor.am-ին հայտնեց ՌԴ-ում ՀՀ դեսպանության մաքսային կցորդ Վահան Հակոբյանը։
Նրա խոսքով՝ Հայաստանից 500 բեռնատար է մեկնել Վերին Լարսի ուղղությամբ, մի մասը գտնվում է Վրաստանի տարածքում, մյուս մասն էլ մաքսազերծում է անցնում անցակետում։
«Մեքենաների միջին քանակություն է, որը միշտ ճանապարհներին լինում է։ Այս իրավիճակը սեզոնին համահունչ է։ Երբ տուրիստական սեզոնը սկսվեց, մեծ կուտակումներ եղան, հիմա անցակետում նման կուտակումներ չկան, իրավիճակը կարգավորվել է»,- նշեց ՌԴ-ում ՀՀ դեսպանության մաքսային կցորդը։
Հիշեցնենք` հուլիսի 8-ին տեղեկություններ էին հաղորդվել, որ ռուս-վրացական սահմանին ավելի քան 3 հազար բեռնատար է կուտակվել, սոցցանցերի օգտատերերը գրում էին, որ ստիպված են շուրջ 10 ժամ սպասել իրենց հերթին։
Կուտակումներն առաջացել էին զբոսաշրջային սեզոնի սկսելու հետ կապված, քանի որ սահմանը հատող զբոսաշրջիկների թիվը կտրուկ ավելացել է:
Մանյա Պողոսյան
