19.12.2025 | 23:33
ԱՄՆ-ի, Ռուսաստանի և Ուկրաինայի բանակցությունների նոր փուլը տեղի կունենա ԱՄՆ-ում առաջիկա օրերին
Բաքվի դատարանը Ռաշիդ Բեգլարյանին դատապարտեց 15 տարվա ազատազրկման
Քաղաքականություն
12.07.2024 | 13:56
Բաքվի դատարանը Արցախում մոլորված ու ադրբեջանցիների կողմից ձերբակալված Ռաշիդ Բեգլարյանին դատապարտեց 15 տարվա ազատազրկման։ Նրան մեղադրում են, իբր, «Խոջալուի ցեղասպանության» իրականացման մեջ։
Նշենք, որ նիստը կայացել է Սաբունչիի շրջանային դատարանում՝ Ֆիզուլիի ռազմական դատարանի դատավոր Ալի Սուլեյմանովի նախագահությամբ։ Ադրբեջանական լրատվամիջոցները գրում են, որ առաջին 5 տարին նա պետք անցկացնի բանտում, իսկ հաջորդ 10-ը՝ խիստ ռեժիմի գաղութում։ Դատախազը պահանջել էր 17 տարվա ազատազրկում։
«Իմ որակավորումով բանակ զորակոչվել եմ որպես վարորդ։ Ոչ ոք չի կարող խուսափել հրամանից։ Ես բարձել և տեղափոխել եմ այն ամենը, ինչ ինձ ասել են։ Խնդրում եմ մարդկային ու ավելի թեթև պատիժ տալ»,- վերջին խոսքում ասել է Բեգլարյանը։
Հիշեցնենք, որ Արցախի Հանրապետության քաղաքացի Ռաշիդ Բեգլարյանը 2023 թվականի օգոստոսի 1-ին Շուշիի շրջանի Հին Շեն գյուղից դուրս էր եկել և մոլորվելու հետևանքով հայտնվել Ադրբեջանի վերահսկողության տակ գտնվող տարածքում։ Ադրբեջանցի սահմանապահները նրան ձերբակալել էին։
Ադրբեջանի Պետական անվտանգության ծառայությունը հայտարարել էր, թե «քննչական գործողությունների ընթացքում Ռաշիդ Բեգլարյանը մանրամասն տեղեկություններ է հաղորդել կատարված հանցագործությունների մասին՝ հստակ նշելով այն վայրերը, որտեղ հանցավոր գործողություններ են կատարվել խաղաղ բնակչության նկատմամբ»։ Ըստ հաղորդագրության՝ նա մեղադրվում է, իբր, Ստեփանակերտի թիվ 3 մանկական հիվանդանոցում պահվող«գերեվարված ադրբեջանցիներին խոշտանգելու, ինչպես նաև խաղաղության և մարդկության դեմ հանցագործությունների, պատերազմական հանցագործությունների, անօրինական զինված կազմավորումների գործունեությանը մասնակցելու համար»:
Էմմա Չոբանյան
