11.01.2025 | 20:13
Կրակը Գլենդելից հեռու է. քաղաքապետը մանրամասներ է ներկայացրել
Մոսկվան անհանգստացած է, որ ՀՀ-ում ԵՄ առաքելությունը կարող է դառնալ մշտական․ Գալուզին
Քաղաքականություն
12.07.2024 | 11:12
Ռուսաստանը մտահոգված է Հայաստանում ԵՄ դիտորդական առաքելության գործունեության ընդլայնմամբ, դրանում Կանադայի ներկայացուցիչների մասնակցությունը ցույց է տալիս ՆԱՏՕ-ի սողացող ներթափանցումը Հարավային Կովկաս։ Այս մասին ՌԻԱ Նովոստիին ասել է ՌԴ փոխարտգործնախարար Միխայիլ Գալուզինը։
«Մենք բացասաբար ենք գնահատում Հայաստանում ԵՄ առաքելության գործունեությունը, ինչի մասին բազմիցս ասել ենք»,- նշել է նա։
Գալուզինի խոսքով՝ Եվրամիության խնդիրն է փորձել ամրապնդվել Հարավային Կովկասում՝ ի վնաս տարածաշրջանի պետությունների՝ Ռուսաստանի, Իրանի և Թուրքիայի ավանդական գործընկերների և հարևանների շահերին։ Նա նշել է, որ Մոսկվային մտահոգում է նաև այն, որ առաքելությունը ոչ միայն ընդլայնվում է Երևանի հավանությամբ, այլև սպառնում է ժամանակավորից դառնալ մշտական։
«Բացի այդ, ինչպես հայտնի է՝ ապրիլին այս տարվա առաքելության կազմում հայտնվել են կանադական ներկայացուցիչներ, որը դե ֆակտո նշանակում է ՆԱՏՕ-ականների սողացող ներթափանցում Հարավային Կովկաս»,- ասել է Գալուզինը։
Ըստ նրա՝ ԵՄ դիտորդների աշխատանքից, իբր, շոշափելի արդյունք չի գրանցվել, օրինակ՝ նրանց ներկայությունը չի կանխել պարբերական սրացումները հայ-ադրբեջանական սահմանին։ Առաքելությունը զեկույցներ է ուղարկում անմիջապես Բրյուսել և դրանք չի կիսում անգամ Հայաստանի հետ։
«Բոլոր հիմքերը կան ենթադրելու, որ արևմտականները հետախուզական տվյալներ են հավաքում ռուսական օբյեկտների, ինչպես նաև Հայաստանին հարակից բոլոր պետությունների վերաբերյալ։ Մենք նախկինի պես համոզված ենք, որ Հարավային Կովկասում կայուն խաղաղության կարելի է հասնել միայն Ռուսաստանի, Ադրբեջանի և Հայաստանի ղեկավարների միջև 2020-2022 թվականների եռակողմ համաձայնագրերի համապարփակ իրականացման հիման վրա»,- նշել է ՌԴ ԱԳ փոխնախարարը՝ նշելով, թե Մոսկվան մշտապես բարձրացնում է ԵՄ առաքելության թեման Երևանի և տարածաշրջանային այլ գործընկերների հետ շփումներում։
