Վրաստանի՝ ԵՄ-ին անդամակցելու գործընթացը կասեցված է․ Թբիլիսիում ԵՄ դեսպան

Վրաստանի՝ Եվրամիությանն անդամակցության գործընթացը ներկայում կասեցված է։ Հուսով եմ, որ ընտրություններից հետո նոր կառավարությունը կրկին լուրջ աշխատանք կսկսի Եվրամիությանն ինտեգրվելու ուղղությամբ։ Այս մասին հայտարարել է Վրաստանում ԵՄ դեսպան Պավել Գերչինսկին։

Նրա խոսքով՝ Վրաստանի ներկայիս իշխանությունների մտադրությունները պարզ չեն Եվրամիության ղեկավարների համար։

«Հունիսի 27-ին, ուղիղ տասը օր առաջ, Եվրամիության ղեկավարները, ԵՄ երկրների նախագահներն ու վարչապետները Բրյուսելում մի քանի շատ կարևոր որոշումներ են ընդունել։ Նրանք պայմանավորվել են Եվրամիության ապագա ռազմավարական օրակարգի, Եվրամիության ապագա առաջնորդների ինքնության շուրջ։ Նրանք վերահաստատել են մեր ամուր հանձնառությունն Ուկրաինայի պաշտպանությանը։ Ինձ համար շատ տխուր է ասել, որ նրանք նաև համաձայնեցրել են դադարեցնել ԵՄ-ին Վրաստանի անդամակցության գործընթացը։ Այդ մասին հստակ ասվում է Եվրոպայի խորհրդի եզրակացությունում։ Ուշադիր կարդացեք, այնտեղ կան մի շարք կետեր»,- ասել է դեսպանը։

Նա նշել է, որ Վրաստանի ներկայիս  իշխանությունների մտադրությունները պարզ չեն Եվրամիության ղեկավարներին։ «Օտարերկրյա ազդեցության թափանցիկության մասին» օրենքը հստակորեն հեռացնում է երկիրը ինը քայլերն ավարտելուց, և հակաարևմտյան, հակաեվրոպական հռետորաբանությունը նույնպես լիովին անհամատեղելի է Եվրամիությանն անդամակցելուն հայտարարված նպատակին:

«Ուստի, ցավոք, այս պահին Եվրամիությանը Վրաստանի անդամակցության գործընթացը կասեցված է։ Սա իսկապես տխուր և հիասթափեցնող է, քանի որ, միևնույն ժամանակ, մենք արագ առաջընթաց ենք գրանցում այլ թեկնածու երկրների հետ: Ինչպես գիտեք՝ այս որոշման հաջորդ օրը Եվրամիությունը բանակցություններ է սկսել Ուկրաինայի և Մոլդովայի անդամակցության շուրջ։ Ես անկեղծորեն հուսով եմ, որ Վրաստանում ընտրություններից հետո, հոկտեմբերից հետո նոր կառավարությունը, ինչպիսին էլ այն լինի, կրկին լուրջ աշխատանք կսկսի Եվրամիությանն ինտեգրվելու ուղղությամբ»,- ասել է Գերչինսկին՝ նշելով, որ միայն Վրաստանից ու վրացիներից է կախված՝ երկիրը կդառնա՞ Եվրամիության հաջորդ ընդլայնման մաս, թե՝ ոչ։