Լեյբորիստները հաղթել են Մեծ Բրիտանիայի ընտրություններում․Ռիշի Սունակն ընդունել է պարտությունը, վարչապետ կդառնա Քիր Սթարմերը

Սըր Քիր Սթարմերի գլխավորած Լեյբորիստական ​​կուսակցությունը Մեծ Բրիտանիայի արտահերթ խորհրդարանական ընտրությունների արդյունքներով հավաքել է Համայնքների պալատի ձայների մեծամասնությունը։ Սա նշանակում է՝ Մեծ Բրիտանիայում պահպանողականների կառավարման 14 տարվա ավարտը, գրում է BBC-ի ռուսական ծառայությունը։

Ձայների հաշվարկը բոլոր ընտրատարածքներում դեռ չի ավարտվել, սակայն լեյբորիստներն արդեն պաշտոնապես հաղթել են դրանցից 381-ում՝ ապահովելով իրենց հարմարավետ մեծամասնությունը 650 տեղանոց պալատում:

Քիր Սթարմները և ստվերային կառավարության ֆինանսների նախարար Ռեյչել Ռիվզը, որի համար ապագա կառավարությունում նշանակությամբ երկրորդ պաշտոնն են կանխատեսում, վստահ հաղթել են իրենց ընտրատարածքներում։

Արդյունքների հրապարակումից հետո կարճ ելույթում Սթարմերը, մասնավորապես, ասել է․ «Փոփոխությունները սկսվում են հենց այստեղից, քանի որ սա ձեր ժողովրդավարությունն է, ձեր համայնքը, ձեր ապագան: Դուք քվեարկել եք։ Հիմա ժամանակն է, որ մենք կատարենք մեր խոստումները»։

Գործող վարչապետ Ռիշի Սունակը, որը ևս վերընտրվել է իր  ընտրատարածքում, նա խոստովանել է, որ պահպանողականները պարտվել են։  Նա շնորհավորել է Սթարմերին հաղթանակի կապակցությամբ։

«Այսօր իշխանության փոխանցումը տեղի կունենա խաղաղ և կանոնավոր, բոլոր կողմերի բարի կամքով։ Սա պետք է բոլորիս վստահություն տա մեր երկրի կայունության և ապագայի նկատմամբ։ Բրիտանացիներն այսօր սթափեցնող դատավճիռ են կայացրել, սովորելու շատ բան կա, և ես ստանձնում եմ ձախողման պատասխանատվությունը»,- հայտարարել  է Սունակը:

Նրա գլխավորությամբ Պահպանողական կուսակցությունը  ստացել է ընդամենը 131 մանդատ։ Սա պահպանողականների ամենավատ ցուցանիշն  է 20-րդ դարասկզբից ի վեր: Երրորդ արդյունքը  Լիբերալ-դեմոկրատներինն է ՝ 61 մանդատ, չորրորդը՝ Նայջել Ֆարաջի աջ պոպուլիստական ​​Reform UK կուսակցությանըը՝ 13 մանդատ։