12.03.2026 | 22:08
Թուրքիան դեմ է Իրանում քաղաքացիական պատերազմ հրահրելու ցանկացած ծրագրի. Ֆիդան
Ոստիկանների կողմից ֆիզիկական ուժի, հատուկ միջոցների գործադրման հետևանքով քաղաքացիներին վնասվածքներ պատճառելու դեպքի առթիվ նախաձեռնվել է քրեական վարույթ․ ՔԿ
Հասարակություն
03.07.2024 | 11:50
2024 թվականի հունիսի 12-ին Երևանի Բաղրամյան պողոտայի և Դեմիրճյան փողոցի խաչմերուկում տեղի ունեցած բողոքի ակցիաների ժամանակ ոստիկանության ծառայողների կողմից ֆիզիկական ուժի, հատուկ միջոցների գործադրման հետևանքով քաղաքացիներին մարմնական վնասվածքներ պատճառելու դեպքի առթիվ նախաձեռնվել է քրեական վարույթ։ Այս մասին Factor.am-ի գրավոր հարցմանն ի պատասխան հայտնել են Քննչական կոմիտեից։
Կոմիտեից չեն հստակեցրել՝ արդյո՞ք խոսքը նույն օրը՝ լուսաձայնային նռակների կիրառումից մեկ ժամ անց նախաձեռնված քրեական վարույթի մասին է։ ՔԿ-ն շտապել էր տեղեկացնել, որ հավաքի մասնակիցները չեն ենթարկվել ոստիկանության ծառայողների օրինական պահանջներին, սկսել են հասարակական անվտանգությանը սպառնացող զանգվածային անկարգություններ։
«Նախաքննության ընթացքում մարմնական վնասվածք ստացած անձինք ճանաչվել են տուժող, որոշում է կայացվել դատաբժշկական փորձաքննություն նշանակելու մասին՝ ստացած մարմնական վնասվածքների բնույթն ու ծանրության աստիճանը պարզելու նպատակով»,- նշված է գրավոր պատասխանում։
Թե քանի քաղաքացի է տուժող ճանաչվել, իրավապահ կառույցից չեն նշել։ Օրերս պաշտոնական հաղորդագրությամբ տեղեկացրել էին, որ նախաքննության ընթացքում մի շարք անձինք՝ այդ թվում 8 լրագրողներ, ճանաչվել են տուժող։ Նույն հաղորդագրությամբ ՔԿ-ն հայտնել էր, որ Բաղրամյան-Դեմիրճյան խաչմերուկում բողոքի ակցիայի ընթացքում զանգվածային անկարգություններ, խուլիգանություն կատարելու համար հանրային քրեական հետապնդում է հարուցվել 16 անձի նկատմամբ։
Արփի Հակոբյան
