ԵՄ-ի հարցով հանրաքվե անցկացնելու մասին հայտարարությունն Ալեն Սիմոնյանի անձնական դիրքորոշումն է, քաղաքական որոշում չկա․ ԱԺ նախագահի օգնական

«Մեր հասարակությունն ունի որոշում՝ լինել ԵՄ մաս։ Մի քանի օր առաջ մեր խորհրդարանում քննարկում էր հանրաքվեի մասին, որ Հայաստանը դառնա ԵՄ մաս։ Ես կարծում եմ, որ երբևէ մոտ ապագայում մեզ մոտ կլինի այդ հանրաքվեն և վստահ եմ, որ մեր մարդիկ կասեն՝ «այո»»,- այս մասին Լատվիա կատարած այցի ընթացքում Rus.LSM-ի հետ զրույցում հայտարարել էր Հայաստանի Ազգային ժողովի նախագահ Ալեն Սիմոնյանը։

Factor.am-ը ԱԺ նախագահի օգնականին հարց ուղղեց՝ արդյո՞ք ԵՄ-ին անդամակցելու հարցով հանրաքվե անցկացնելու վերաբերյալ իշխանությունը քաղաքական որոշում ունի, թե՞ դա Ալեն Սիմոնյանի կարծիքն է։ ԱԺ նախագահի օգնական Մովսես Հարությունյանը հայտնեց, որ հնչածն Ալեն Սիմոնյանի անձնական դիրքորոշումն է, ԵՄ-ին անդամակցելու հարցով հանրաքվե անցկացնելու վերաբերյալ քաղաքական որոշում այս պահին չկա։

Հստակեցնող հարցին, թե «երբևէ մոտ ապագայում» հայտարարությունը նշանակո՞ւմ է, որ այդ հանրաքվեն, հնարավոր է, այս տարվա ընթացքում տեղի ունենա, Սիմոնյանի օգնականը շեշտեց, որ կոնկրետ ժամկետներ չեն հստակեցվում՝ «յուրաքանչյուրն ինչպես կհասկանա»։

Հիշեցնենք, որ «Ժողովրդավարական ուժերի հարթակն» առաջարկում է 4 ամսվա ընթացքում հանրաքվե անցկացնել ԵՄ-ին ՀՀ-ի անդամակցության հայտ ներկայացնելու հարցով։ Այս թեմայի շուրջ նաև խորհրդարանական լսումներ տեղի ունեցան։
Ավելի վաղ Factor TV-ի հարցին ի պատասխան՝ Ալեն Սիմոնյանը «հետաքրքիր և պահանջված» էր գնահատել չորս քաղաքական ուժերի և ՀԿ-ների՝ ԵՄ-ին անդամակցության հանրաքվե անցկացնելու առաջարկը։

Մանյա Պողոսյան

Երբևէ մոտ ապագայում մեզ մոտ կլինի այդ հանրաքվեն և, վստահ եմ, որ մեր մարդիկ կասեն՝ «այո»․ Ալեն Սիմոնյան