Անտեսվե՞լ է Փաշինյանի ասածը․ Արագածի մարզադահլիճի ցնցուղի գնի վերաբերյալ յոթ ամիս անց բացատրություն չկա, ՊՎԾ-ն ստուգում չի արել

Պետական վերահսկողական ծառայությունը ուսումնասիրություն չի իրականացրել Արմավիրի մարզի Արագած բնակավայրի դպրոցի և մարզադահլիճի շինարարության ծախսերի առնչությամբ։ Այս մասին Factor.am-ի գրավոր հարցմանն ի պատասխան հայտնում են գերատեսչությունից։

«ՀՀ պետական վերահսկողական ծառայության կողմից Արագած բնակավայրի դպրոցի կառուցման աշխատանքների, նախագծման, հեղինակային/տեխնիկական հսկողության, ինչպես նաև գույքով ապահովելու նպատակով հատկացված պետական միջոցների կառավարման օրինականության և արդյունավետության վերահսկողության ապահովման նպատակով ուսումնասիրություն չի իրականացվել»,- հայտնել են Factor.am-ի գրավոր հարցմանն ի պատասխան։

Հիշեցնենք՝ սա այն կրթական հաստատությունն է, որտեղ հունվարի 5-ին այցելել էր Նիկոլ Փաշինյանն ու ցուցադրաբար դժգոհել շինարարության և տեղադրված գույքի որակից։ Կառավարության հրապարակած տեսանյութում երևում է, թե ինչպես է Փաշինյանը ցնցուղը վերցնում և դիմելով ԿԳՄՍ նախարար Ժաննա Անդրեասյանին՝ ցուցումներ տալիս։

Փաշինյանը տեղաշարժեց նոր դրված ծորակները․ պնդեց՝ աչք չի փակելու թերությունների վրա, պիտի վերացվեն․ ՏԵՍԱՆՅՈՒԹ

«Էս վերցրեք, տեսեք՝ տեխնիկական բնութագրով ի՞նչ գնանոց ա, ու սա ի՞նչ արժե մեր շուկայում, ամենայն լրջությամբ եմ ասում»,- ասում է վարչապետը, սակայն, ցնցուղն այլ պաշտոնյա է վերցնում։

Factor TV-ն երեկ էր ծավալուն անդրադարձ կատարել, թե ինչ հետևանքներ են ունեցել Փաշինյանի աղմկահարույց ստուգումները։ ՊՎԾ-ն մեր՝ ավելի վաղ ուղարկված հարցմանն ի պատասխան Արագած բնակավայրի դպրոցի խնդիրների վերաբերյալ հարցերին չէր պատասխանել։ Այս մասին մենք արձանագրում էինք արել հունիսի 27-ի հրապարակման մեջ։ Մեր ռեպորտաժի հրապարակումից ստացել ենք երկրորդ հարցման պատասխանը, որում նաև պարզաբանվել է, թե ինչու այդ համայնքի դպրոցի հետ կապված ուսումնասիրություններ չեն կատարվել։

Փաշինյանի հունից դուրս գալն ու ցնցուղ-ծորակի գինը. ՊՎԾ-ն շրջանցե՞լ է այս դրվագը. ՏԵՍԱՆՅՈՒԹ

««Պետական վերահսկողական ծառայության մասին» օրենքի 6-րդ հոդվածի
1-ին մասի համաձայն՝ Ծառայության կողմից ուսումնասիրություններն իրականացվում են Ծառայության ղեկավարի տված հանձնարարագրերի հիման վրա՝ համաձայնեցնելով ՀՀ վարչապետի հետ»,-ասված է պատասխանում։

Թե ինչու Փաշինյանն իր իսկ բարձրացրած աղմուկից հետո չի հանձնարարել ուսումնասիրել՝ արդյոք այդ դրվագով պետական միջոցներն արդյունավետ են ծախսվում, առնվազն հարցեր են առաջացնում։ Մասնավորապես, ո՞րն է Նիկոլ Փաշինյանի նպատակը՝ ինտրիգային տեսարաններ ապահովել, թե արդյունավետ կառավարում իրականացնել։

Այս դպրոցի վերանորոգման և կահավորման համար ՀՀ պետական բյուջեից հատկացվել էր 350 մլն դրամ։ Factor.am-ը տեղեկանում է Գնումների պետական համակարգից։ Աշխատանքներն իրականացրել է «ՀԱԷԿ շինարարություն» ՓԲԸ-ն։ Պայմանագրով Արագածի դպրոցի մարզադահլիճի համար գնված ցնցուղի արժեքը 72 հազար դրամ է։ Արդեն յոթ ամիս անց չի տրվել Նիկոլ Փաշինյանի հարցի պատասխանը՝ արդյո՞ք գնված ցնցուղը որակով և արժեքով համապատասխանում է պայմանագրում առկա գին/որակին։ Այս հարցի առնչությամբ մինչ օրս որևէ գերատեսչություն պարզաբանում չի ներկայացրել։ Ինչպես հատնեցինք վարչապետի վերահսկողության ծառայությունն էլ ուսումնասիրություն չի իրականացրել։ Սա, ըստ էության, պայմանավորված է նաև խնդիրը բարձրացնողի անհետևողականությամբ։

Նարեկ Կիրակոսյան