Տնտեսություն
26.06.2024 | 17:28
Հայաստանի պետական պարտքը հատել է 12 մլրդ դոլարի շեմը։ Այս մասին Factor.am տեղեկանում է ՀՀ Ֆինանսների նախարարության հրապարակած տվյալներից։
Այս տարվա մայիսի 31-ի դրությամբ ՀՀ պետական պարտքը կազմել է 12 մլրդ 102,8 մլն դոլար։ 2023 թվականի վերջին ՀՀ պետական պարտքը 11․8 մլրդ դոլար է եղել։ Այսինքն՝ ՀՀ պետական պարտքը 5 ամսում աճել է շուրջ 300 մլն դոլարով կամ 2,5 %-ով։
ՀՀ Կառավարության պարտքը կազմում է 11 մլրդ 577 մլն դոլար, Կենտրոնական բանկինը՝ 525․2 մլն դոլար։
Կառավարության պարտքի 5 մլրդ 766 մլն դոլարը արտաքին պարտքն է, 5 մլրդ 811 մլն-ը ներքին պարտքը։
Նշենք, որ տարեսկզբի համեմատ ՀՀ Կառավարության արտաքին պարտքը նվազել է՝ 5 մլրդ 901,6 մլն դոլարից հասնելով 5 մլրդ 766 մլն դոլարի, իսկ ներքին պարտքն աճել՝ 5 մլրդ 501 մլն դոլարից հասնելով 5 մլրդ 581 մլն դոլարի։ Այսպիսով՝ կարելի է ասել, որ տարեսկզբի համեմատ շուրջ 300 մլն դոլարի պարտքի ավելացումը տեղի է ունեցել ներքին պարտքի աճի հաշվին։
Մասնավորապես աճել են ռեզիդենտների կողմից ձեռք բերված պետական պարտատոմսերը՝ տարեսկզբի 4 մլրդ 966 մլն դոլարից հասնելով 5 մլրդ 251,2 մլն դոլարի։
Այլ կերպ ասած՝ Կառավարությունը նախընտրում է պարտք անել Հայաստանի քաղաքացիներից, քան արտաքին աղբյուրներից։
Անժելա Պողոսյան
