03.08.2026 | 23:30
Տաթև-Լծեն ավտոճանապարհին բեռնատարը դուրս է եկել երթևեկելի հատվածից և բախվել հողաթմբին
Զարեհ Սինանյանը 37 հազար դոլար է ծախսել հանգստի վրա․ ինչ է հայտարարագրել Սփյուռքի հանձնակատարը
24.06.2024 | 20:44
ՀՀ վարչապետին կից Սփյուռքի գործերի գլխավոր հանձնակատար Զարեհ Սինանյանի տարեկան եկամուտն աճել է շուրջ 2,8 մլն դրամով։ Այս մասին տեղեկանում ենք Կոռուպցիայի կանխարգելման հանձնաժողով նրա ներկայացրած 2023 թվականի հայտարարագրից։ Սինանյանի եկամտի միակ աղբյուրը վարչապետի աշխատակազմից ստացած աշխատավարձն է՝ 1 տարում շուրջ 17 մլն դրամ՝ նախորդ տարվա 14,2 մլն դրամի փոխարեն։
Սինանյանը Երևանի կենտրոնում կնոջ՝ Լորի Սինանյանի հետ համատեղ սեփականության 1 բնակարան ունի, որը ձեռք է բերել 2021 թվականին։
Նա «Նեյշնլ Լայֆ Գրուպ» ընկերությունում արժեթղթեր ունի 123 հազար դոլարի և 140 հազար դոլարի։ Նույն ընկերությունում արժեթղթեր ունի նաև նրա կինը՝ 2 մասով՝ յուրաքանչյուրը 212 հազարական դոլար։
Սինանյանի բանկային հաշիվներին ընդհանուր առմամբ շուրջ 110 հազար դոլար և շուրջ 6 մլն դրամ ունի, 32 հազար դոլար էլ կանխիկ գումար։
Զարեհ Սինանյանը տարվա ընթացքում հանգստի համար ծախսել է շուրջ 37 հազար դոլար, շուրջ 8,6 մլն դրամ էլ ծախսել է ուսման կամ այլ դասընթացների համար։
Նրա կինը՝ Լորի Սինանյանը, արտերկրի քաղաքացի է, իրավաբան, սակայն չի նշվում, թե որտեղ է աշխատում։ Նա 2021 թվականին միանձնյա սեփականության 2 ավտոկայանատեղի է ձեռք բերել Երևանի կենտրոնում։
Լորի Սինանյանը վարում է 2019 թվականի արտադրության HONDA մակնիշի մեքենա, որը գնել է նույն տարում։ Նա բանկում 2 ավանդ ունի՝ 16 հազար դոլար և 20 հազար եվրո։ Որպես կանխիկ 44 հազար դոլար գումար է հայտարարագրել տարեվերջի դրությամբ, բանկային 16 հաշիվներին շուրջ 500 հազար դոլար, 25 մլն դրամ և 247 եվրո ունի։
Անժելա Պողոսյան
