Վտանգավոր շերտ եմ տեսնում, որ պետք է հասկանալ Ադրբեջանին, չմեղադրել․ քաղաքագետը՝ Փաշինյանի հայտարարության մասին. ՏԵՍԱՆՅՈՒԹ

«Ադրբեջանն ասում է՝ դու ինձ չես թողել, որ ես 30 տարի ապրեմ, ես էլ քեզ չեմ թողնի, որ դու ապրես․ պիտի վրեժս քեզանից լուծեմ, և սա ամենամեծ մարտահրավերն է, որը պիտի հաղթահարենք»,- այս մասին Հանքավանում «Քաղաքացիական պայմանագիր» կուսակցության քաղաքական ժողովին իր ելույթի ժամանակ ասել է ՀՀ վարչապետ, ՔՊ վարչության նախագահ Նիկոլ Փաշինյանը:

Վարչապետի այս հայտարարությունը երկու շերտ ունի․ Factor.am-ի հետ զրույցում նման կարծիք հայտնեց քաղաքագետ Արմեն Հովհաննիսյանը։

Ըստ նրա՝ ակնհայտ է, որ Ադրբեջանը մտադիր չէ Հայաստանի հետ իրավահավասար, խաղաղ գոյակցության հարաբերություններ ունենալ։
Քաղաքագետի խոսքով՝ Ադրբեջանը բացահայտ ցանկանում է Հայաստանը «կիսապետություն» դարձնել՝ այդպիսով իր գերակայությունն ապահովելով տարածաշրջանում։

Արմեն Հովհաննիսյանը Փաշինյանի ասածներում վտանգներ է տեսնում։

«Ասածի մեջ հետևյալ վտանգավոր շերտն եմ տեսնում, որ պետք է հասկանալ Ադրբեջանին, պետք չէ նրան մեղադրել այդ պահվածքի համար, որովհետև դրանում Հայաստանի Հանրապետությունն է մեղավոր, որովհետև իրենց հետ մենք այդպես ենք վարվել 30 տարի, չենք թողել ապրեն։ Պարզվում է՝ չապրած երկիրը միլիոնավոր դոլարների նավթ է վաճառել, զենք է առել, բանակ զարգացրել, որ լուծի Արցախի հարցն այնպես, ինչպես իրենք են պատկերացնում էթնիկ զտումը»,- նկատեց նա։

Արմեն Հովհաննիսյանի դիտարկմամբ՝ այս կերպ Փաշինյանը նախապես արդարացնում է «այն անվերջանալի զիջումները, որոնց գնում է Հայաստանը»։

Մանրամասները՝ տեսանյութում։

Մանյա Պողոսյան