14.09.2026 | 23:23
Պապիկյանի գլխավորած պատվիրակությունն աշխատանքային այցով մեկնել է Չինաստան
Վկաների հարցաքննության փուլում Արմեն Աշոտյանի գործի քննության ուղիղ հեռարձակումն արգելվել է
Հասարակություն
24.06.2024 | 13:37
ՀՀԿ փոխնախագահ Արմեն Աշոտյանի գործով նիստը հասել է վկաների հարցաքննության փուլին, և Դատախազությունը միջնորդել է դադարեցնել նիստի ուղիղ հեռարձակումը։ Պաշտպանական կողմն առարկել է։
«Հասանք հրապարակայնության սկզբունքի դե ֆակտո զրոյացմանը։ Դատախազի միջնորդությամբ՝ Աշոտյանի գործով դատարանը հանրությանը զրկեց ուղիղ եթերով վկաների հարցաքննությանը հետևելու և սեփական «վճիռը» կայացնելու հնարավորությունից։ Դատախազության այս միջնորդությունը ինքնին բավարար է՝ հաստատված ճանաչելու մեր բուն պնդումն այն մասին, որ սա դասական քաղաքական հետապնդում է։
ՀԳ. Մենք խստորեն առարկեցինք, բայց ակնհայտ էր, որ որոշումը կայացվել էր նախապես»,- Ֆեյսբուքի իր էջում գրել է Աշոտյանի պաշտպան Ռուբեն Մելիքյանը։
Նշենք, որ Քրեական դատավարության օրենսգրքի համաձայն՝ վկաները պետք է անջատ հարցաքննվեն, իսկ ուղիղ հեռարձակում իրականացնելու պայմանններում, փաստացի, նրանք հնարավորություն են ունենում ուղիղ եթերով հետևելու դատարանում հարցաքննվող վկաների տված ցուցմունքին։ Սակայն հարկ է նկատել, որ բոլոր գործերով չէ, որ Դատախազությունը միջնորդում է վկաների հարցաքննության փուլում դադարեցնել ուղիղ հեռարձակումը և բոլոր դեպքերում չէ, որ դատարանը բավարարում է այդ միջնորդությունները։
Արաքս Մամուլյան
