25.08.2026 | 21:53
Սեպտեմբերի 1-ից դպրոցների հարակից տարածքներում ոստիկանությունը կանցկացնի ուժեղացված ծառայություն
Բաքվում պահվող Արցախի ղեկավարների շինծու գործերն առաջիկայում կուղարկվեն դատարան
Քաղաքականություն
24.06.2024 | 14:20
Ադրբեջանի կողմից առևանգված ու ապօրինաբար Բաքվում պահվող Արցախի նախկին ու ներկա ղեկավարների, պաշտոնյաների նկատմամբ հարուցված շինծուքրեական գործերը շուտով ներկայացվելու են դատարան։ Այս մասին Ստեփանակերտում կազմակերպված համաժողովի շրջանակում լրագրողների հետ զրույցում ասել է Ադրբեջանի գլխավոր դատախազ Քյամրան Ալիևը։
Նա նշել է, որ 15 անձի նկատմամբ հետաքննությունն ավարտվել է։
«Ներկայում մեղադրյալները, փաստաբանները և տուժողները ծանոթանում են քրեական գործի նյութերին։ Ճանաչողական փուլի ավարտից հետո մեղադրական եզրակացությունը կուղարկվի դատարան»,- ասել է Ալիևը։
Հիշեցնենք, որ այս տարվա ապրիլին Բաքվի դատարանը երկարացրել էր Ադրբեջանում ապօրինաբար բանտում պահվող Արցախի նախկին ու ներկա ռազմաքաղաքական ղեկավարների կալանքի ժամկետը։
Նախ 5 ամսով երկարացվել է Արցախի նախկին նախագահներ Արայիկ Հարությունյանի, Բակո Սահակյանի, Արկադի Ղուկասյանի, ԱԳ նախկին նախարար Դավիթ Բաբայանի, ԱԺ նախագահ Դավիթ Իշխանյանի, ՊԲ նախկին հրամանատար Լևոն Մնացականյանի և ՊԲ նախկին փոխհրամանատար Դավիթ Մանուկյանի ապօրինի կալանքի ժամկետը։ Ավելի ուշ Արցախի նախկին պետնախարար Ռուբեն Վարդանյանի կալանքի ժամկետը նույնպես երկարաձգվել է 5 ամսով։
Էմմա Չոբանյան
