26.06.2026 | 13:12
Ալեն Սիմոնյանը ներողություն չի խնդրի Ռոբերտ Քոչարյանից. երկրորդ նախագահը պարտվել է դատարանում
Գագիկ Խաչատրյանի՝ 4 տարի քննված գործի քննությունը նորից կսկսվի․ ԲԴԽ-ի ֆիլմում գովասանքի արժանացած դատավոր Արթուր Մկրտչյանը թոշակի է անցել
21.06.2024 | 16:33
Դատավոր Արթուր Մկրտչյանի լիազորություններն այսօր դադարել են 65 տարին լրանալու կապակցությամբ։ Այն գործերը, որոնք նա չի հասցրել ավարտել, կմակագրվեն այլ դատավորների և կսկսվեն նորից։ Մկրտչյանի վարույթի անավարտ գործերից մեկը ՊԵԿ նախկին նախագահ, Ֆինանասների նախկին նախարար Գագիկ Խաչատրյանի և եղբորորդու գործն է։
Այն դատարան է ուղարկվել 4 տարի առաջ, և մինչ այսօր քննվում էր։ Հատկանշական է այն հանգամանքը, որ 2024-ի փետրվարին Բարձրագույն դատական խորհրդի աշխատակազմ Դատական դեպարտամենտը ձգձգվող քրեական գործերի մասին ֆիլմ է հրապարակել՝ Գագիկ Խաչատրյանի գործով Արթուր Մկրտչյանի աշխատանքը գնահատելով «շատ որակյալ»։
Այսպիսիով՝ 4 տարի «շատ որակյալ» քննված գործի քննությունը կսկսվի նորից, ընդ որում՝ ամենայն հավանականությամբ՝ այս անգամ այն կուղարկվի Հակակոռուպցիոն դատարան, քանի որ Խաչատրյանին վերագրվում են կոռուպցիոն բնութի հանցագործություններ։
Նշենք, որ պաշտոնավարման ավարտից 3 ամիս անց ԲԴԽ-ն որոշել էր Արթուր Մկրտչյանին Երևանի դատարանից տեղափոխել և նշանակել Սյունիքի մարզի ընդհանուր իրավասության դատարանի դատավոր՝ միևնույն ժամանակ մեկ այլ որոշմամբ նրան գործուղելով Երևանի դատարան։
Այսինքն՝ թեև Մկրտչյանը մինչև այսօր, այսինքն՝ պաշտոնավարման ավարտը աշխատել է Երևանի դատարանում, նրա կենսաթոշակի անցնելու կապակցությամբ թափուր հաստիք է առաջանում Սյունիքի մարզի ընդհանուր իրավասության դատարանում։
Հիշեցնենք, որ Մկրտչյանը դատավոր էր 2010 թվականից։ 2019-2022 թվականներին եղել է Երևանի ընդհանուր իրավասության դատարանի նախագահը։ Այս դատավորը նաև օպերատիվ-հետախուզական միջոցառումներ իրականացնելու վերաբերյալ միջնորդություններ էր քննում, ուստի, ենթադրվում է, որ նրա փոխարեն այլ դատավոր կընտրվի նաև այս գործառույթն իրականացնելու համար։
Արաքս Մամուլյան
